ଓଡ଼ିଶା ସମ୍ବାଦ ବ୍ୟୁରୋ: ଦିନକୁ ୩୦ମିନିଟ୍ ଚାଲିବା, ଯୋଗ ଓ ଜିମ୍ ଯିବା ସହ ସମାନ। କିନ୍ତୁ ଆପଣ ଜାଣନ୍ତିକି ପ୍ରତିଦିନ ଚାଲିବା ଦ୍ୱାରା ଅନେକ ରୋଗ ଭଲ ହୋଇଯାଏ। ସିଡନୀ ୟୁନିଭରସିଟି ଏବଂ ଅଷ୍ଟ୍ରେଲିଆର ସାଉଥ ଡେନମାର୍କ ବିଶ୍ୱବିଦ୍ୟାଳୟର ଅନୁସନ୍ଧାନକାରୀମାନେ ଜାଣିବାକୁ ପାଇଲେ ଯେ, ଦୈନିକ ୧୦ ହଜାର ପାଦ ଚାଲିବା ଦ୍ୱାରା ଡିମେନ୍ସିଆ, ହୃଦ ରୋଗ, କର୍କଟ ଭଳି ଅନେକ ରୋଗ ଭଲ ହୋଇଯାଏ।
ଦୈନିକ ଚାଲିବା ଦ୍ୱାରା ମୃତ୍ୟୁର ହାର ମଧ୍ୟ କମିଯାଏ। ଅଗ୍ରଣୀ ପତ୍ରିକା ଜାମା ଇଣ୍ଟର୍ନାଲ ମେଡିସିନ୍ ଏବଂ ଜାମା ସ୍ନାୟୁବିଜ୍ଞାନରେ ପ୍ରକାଶିତ ପତ୍ରିକା ଅନୁସାରେ, ୭୮,୫୦୦ ଜଣ ବୟସ୍କ ନାଗରିକଙ୍କୁ ଟ୍ରାକର୍ ପିନ୍ଧାଇ ସେମାନଙ୍କ ଉପରେ ନଜର ରଖାଯାଇଥିଲା। ସେମାନଙ୍କ ସ୍ୱାସ୍ଥ୍ୟବସ୍ଥା ସହିତ ତାଙ୍କ ଷ୍ଟେପ୍ ଗଣନାକୁ ଅବଜେକ୍ଟିଭ୍ ଟ୍ରାକ୍ କରିବା ପାଇଁ ଏହା ଥିଲା ସବୁଠୁ ବଡ ଅଧ୍ୟୟନ।
ଏହି ଅଧ୍ୟୟନରୁ ଜଣାଗଲା ଯେ ଯେଉଁମାନେ ଦୈନନ୍ଦିନ ୧୦ ହଜାର ପାଦ ଚାଲୁଥିଲେ ସେମାନଙ୍କ କ୍ଷେତ୍ରରେ ମୃତ୍ୟୁ ହେବାର ଆଶଙ୍କା ୮ ରୁ ୧୧ ପ୍ରତିଶତ ହ୍ରାସ ପାଇଥିଲା। ସେହିପରି ହୃଦରୋଗ ଏବଂ କର୍କଟ ରୋଗୀଙ୍କ ମଧ୍ୟରେ ସମାନ ପ୍ରତିକ୍ରିୟା ଦେଖିବାକୁ ମିଳିଥିଲା। ଦୈନିକ ଅଧିକ ସଂଖ୍ୟକ ଷ୍ଟେପ ଚାଲିବା ଦ୍ୱାରା ୫୦ ପ୍ରତିଶତ ବ୍ୟକ୍ତିଙ୍କଠାରେ ଡିମେନ୍ସିଆ ହ୍ରାସ ହୋଇଥିଲା।
ପ୍ରତିଦିନ ଚାଲିବା ଦ୍ୱାରା ନିମ୍ନରକ୍ତଚାପକୁ ନିୟନ୍ତ୍ରଣ କରିଥାଏ। ଏପରି ରକ୍ତଚାପ ଲାଗି ଆପଣକୁ ୧୦ମିନିଟ୍ ଚାଲିବା ନିତାନ୍ତ ଆବଶ୍ୟକ। ଦୈନିକ ଚାଲିବା ଦ୍ୱାରା ମସ୍ତିଷ୍କ ସୁସ୍ଥ ରହେ। କାରଣ ଚାଲିବା ଦ୍ୱାରା ସ୍ମରଣଶକ୍ତି ମଧ୍ୟ ବୃଦ୍ଧି ପାଇଥାଏ। ଏହାସହ ଦୈନନ୍ଦିନ ଜୀବନର ଖାଦ୍ୟପେୟକୁ ନିୟନ୍ତ୍ରଣ କରି ଅନେକ ମାନସିକ ବିଶାଦରୁ ଶାନ୍ତି ପ୍ରଦାନ କରିଥାଏ। ତେଣୁ ଦୈନନ୍ଦିନ ୧୦ ହଜାର ଷ୍ଟେପ ଚାଲନ୍ତୁ ଓ କ୍ୟାନସର ଭଳି ଅନେକ ମାରାତ୍ମକ ରୋଗ ଭୟରୁ ନିର୍ଭୟ ରୁହନ୍ତୁ।