ଯାଜପୁର: ସାମାନ୍ୟ କଥାରୁ ଗୋଷ୍ଠୀ ସଂଘର୍ଷ। ଯାଜପୁର ଜିଲ୍ଲା କୁଆଖିଆ ଥାନା କଇଁଚି ଶାସନ ଗ୍ରାମରେ ଘଟିଛି ଏହି ଗୋଷ୍ଠୀ ସଂଘର୍ଷ। ଏଥିରେ ୩ ଜଣ ଗୁରୁତର ଆହତ ହୋଇଥିବା ବେଳେ ୨ ଜଣ ସାମାନ୍ୟ ଆହତ ହୋଇଥିବା ଜଣାପଡିଛି । ଆହତଙ୍କୁ ପ୍ରଥମେ ମଧୁବନ ମେଡିକାଲରେ ପ୍ରାଥମିକ ଚିକିତ୍ସା କରାଯାଇ ପରେ ଜଣଙ୍କୁ କଟକ ବଡ଼ ମେଡ଼ିକାଲ ଓ ଅନ୍ୟ ୨ ଜଣଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ସୂଚନାନୁସାରେ, ସରକାରୀ ଯୋଜନାରେ ଆସିଥିବା ମୋ ଖଳା ନିର୍ମାଣ କାର୍ଯ୍ୟକୁ କେନ୍ଦ୍ରକରି ଗ୍ରାମର ୨ ଗୋଷ୍ଠୀ ମଧ୍ୟରେ ଏହି ଗୋଷ୍ଠୀ ସଂଘର୍ଷ ଘଟିଥିଲା । ଗାଁରେ ମୋ ଖଳା ନିର୍ମାଣ କରିବାକୁ ପୂର୍ବରୁ ୨ ଗୋଷ୍ଠୀ ମଧ୍ୟରେ ଛକ୍କାପଞ୍ଝା ଲାଗି ରହିଥିଲା। ତେବେ ଗତକାଲି ଗୋଟିଏ ଗୋଷ୍ଠୀ ମୋ ଖଳା ନିର୍ମାଣ ପାଇଁ ଚିହ୍ନଟ ସ୍ଥାନରେ ବାଲି ପକାଉଥିବା ବେଳେ ଗାଁର ଅନ୍ୟ ଏକ ଗୋଷ୍ଠୀ ତାଙ୍କ ଉପରେ ଅତର୍କିତ ଆକ୍ରମଣ କରିଥିଲେ। ପରେ ଉଭୟ ଗୋଷ୍ଠୀ ମଧ୍ୟରେ ବାଡିଆପିଟା ହୋଇଥିଲା।
ସେପଟେ ଏନେଇ ଥାନାରେ ଅଭିଯୋଗ ପରେ ଗାଁରେ ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ଘଟଣାର ତଦନ୍ତ ଆରମ୍ଭ କରିଛି।
Comments are closed.