ଭୁବନେଶ୍ୱର : ଓଡିଆ ଚଳଚ୍ଚିତ୍ର ଜଗତର ଜଣାଶୁଣା ପ୍ରଯୋଜକ କେଶବ ରାଉତଙ୍କ ରବିବାର ଦିନ ଦେହାନ୍ତ ଘଟିଛି ।
ସେ ଓଡିଶା ଫିଲ୍ମ ପ୍ରଡ୍ୟୁସର ଆସୋସିଏସନର ପ୍ରେସିଡେଣ୍ଟ ଭାବେ ରହିଥିଲେ । ମୃତ୍ୟୁ ବେଳକୁ ତାଙ୍କୁ ୬୮ ବର୍ଷ ବୟସ ହୋଇଥିଲା।
ପରିବାର ବର୍ଗଙ୍କ ପକ୍ଷରୁ ମିଳିଥିବା ସୂଚନାନୁଯାୟୀ ଆଜି ପାଖାପାଖି ଦିନ ୧୧ଟା ସମୟରେ ତାଙ୍କର ହୃଦଘାତରେ ମୃତ୍ୟୁ ହୋଇଥିବା ନେଇ ଜଣାପଡିଛି ।
ସେ ଓଡିଆ ଚଳଚ୍ଚିତ୍ର ‘ସୁନାହରିଣୀ’, ‘ସୁନା ଚଢେଇ’, ‘ସନ୍ତାନ’ ଏବଂ ‘ଭୀଷ୍ମ ପ୍ରତିଜ୍ଞା’ ଆଦିରେ ପ୍ରଯୋଜକ ଭାବେ ରହିଥିଲେ । ଏଥିସହିତ ସେ ଅନେକ ଟେଲି ଧାରାବାହିକରେ ମଧ୍ୟ ପ୍ରଯୋଜନା ଭାର ତୁଲାଇଥିଲେ ।
କେଶବଙ୍କ ମୃତ୍ୟୁରେ ଓଡ଼ିଆ ସିନେ ଜଗତରେ ଅପୂରଣନୀୟ କ୍ଷତି ସୃଷ୍ଟି ହୋଇଥିବା ବେଳେ ତାଙ୍କ ବିୟୋଗରେ ସାରା ଓଲିଉଡ ଜଗତରେ ଶୋକର ଛାୟା ଖେଳି ଯାଇଛି ।