ସିଏମ ଟ୍ରଫି ୨.୦: ରେକର୍ଡ ସଂଖ୍ୟକ ଖେଳାଳିଙ୍କ ଅଂଶଗ୍ରହଣ, ଓଡ଼ିଶାର ତୃଣମୂଳ ସ୍ତରର କ୍ରୀଡ଼ା ପରିବେଶ ହେବ ସୁଦୃଢ଼
ଭୁବନେଶ୍ୱର: ସିଏମ ଟ୍ରଫି ୨.୦ର ଦ୍ୱିତୀୟ ସଂସ୍କରଣ ଆଜି ସଫଳତାର ସହ ଉଦ୍ଯାପିତ ହୋଇଯାଇଛି, ଯାହା ତୃଣମୂଳ ସ୍ତରରେ ଏକ ସୁଦୃଢ଼ କ୍ରୀଡ଼ା ପରିବେଶ ଗଢ଼ିବା ଏବଂ ରାଜ୍ୟରେ ଯୁବ କ୍ରୀଡ଼ା ପ୍ରତିଭାମାନଙ୍କୁ ଚିହ୍ନଟ କରିବା ଦିଗରେ ଓଡ଼ିଶାର ବଡ଼ ପ୍ରୟାସରେ ଆଉ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସ୍ଥାପନ କରିଛି ।
ଏହି ପ୍ରତିଯୋଗିତାରେ ଉଭୟ ବାଳକ ଓ ବାଳିକାଙ୍କ ପାଇଁ ଚାରୋଟି କ୍ରୀଡ଼ା ଶୃଙ୍ଖଳା ଯଥା:- ଫୁଟବଲ୍ (୧୫ ବର୍ଷରୁ କମ୍), ଖୋ-ଖୋ (୧୪ ବର୍ଷରୁ କମ୍), କବାଡି (୧୪ ବର୍ଷରୁ କମ୍) ଏବଂ ଭଲିବଲ୍ (୧୪ ବର୍ଷରୁ କମ୍)ରେ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏକାଧିକ ସ୍ତରରେ ଆୟୋଜିତ ଏହି ସିଏମ ଟ୍ରଫି ୨.୦ରେ ଅଂଶଗ୍ରହଣ ପାଇଁ ଯୁବ ଖେଳାଳିମାନଙ୍କ ଅଭୂତପୂର୍ବ ଆଗ୍ରହ ଦେଖିବାକୁ ମିଳିଥିଲା, ଯେଉଁଥିରେ ୩୦,୦୦୦ରୁ ଅଧିକ ପ୍ରତିଯୋଗୀ ଅଂଶଗ୍ରହଣ କରିଥିଲେ, ଯାହା ଏହାକୁ ରାଜ୍ୟର ବୃହତ୍ତମ ତୃଣମୂଳ ସ୍ତରର କ୍ରୀଡ଼ା କାର୍ଯ୍ୟକ୍ରମରେ ପରିଣତ କରିଛି । ଏହି ଆୟୋଜନ ଯୁବ ଖେଳାଳିମାନଙ୍କ ପାଇଁ ସୁଯୋଗ ସୃଷ୍ଟି କରିବା, ତୃଣମୂଳ ସ୍ତରରେ କ୍ରୀଡ଼ା ଅଂଶଗ୍ରହଣକୁ ପ୍ରୋତ୍ସାହିତ କରିବା ଏବଂ ପ୍ରତିଭା ଚିହ୍ନଟ ତଥା ବିକାଶ ପାଇଁ ଏକ ସୁସଂଗଠିତ ମାର୍ଗ ପ୍ରଶସ୍ତ କରିଛି ।
ଫଳାଫଳ
ଫୁଟବଲ୍ (ବାଳକ ୧୫ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ବରଗଡ଼
* ଉପ-ବିଜେତା (ରନର୍ସ-ଅପ୍): ଯାଜପୁର
ଫୁଟବଲ୍ (ବାଳିକା – ୧୫ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ଭୁବନେଶ୍ବର
* ଉପ-ବିଜେତା (ରନର୍ସ-ଅପ୍): କେନ୍ଦୁଝର
ଖୋ-ଖୋ (ବାଳକ – ୧୪ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ପୁରୀ
* ଉପ-ବିଜେତା (ରନର୍ସ-ଅପ୍): କଟକ
ଖୋ-ଖୋ (ବାଳିକା – ୧୪ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ଖୋର୍ଦ୍ଧା
* ଉପ-ବିଜେତା (ରନର୍ସ-ଅପ୍): ପୁରୀ
କବାଡି (ବାଳକ – ୧୬ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ବାଲେଶ୍ୱର
* ଉପ-ବିଜେତା (ରନର୍ସ-ଅପ୍): ସୁନ୍ଦରଗଡ଼
କବାଡି (ବାଳିକା – ୧୬ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ପୁରୀ
* ଉପ-ବିଜେତା (ରନର୍ସ-ଅପ୍): ଗଞ୍ଜାମ
ଭଲିବଲ୍ (ବାଳକ – ୧୪ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): କଟକ
* ଉପ-ବିଜେwତା (ରନର୍ସ-ଅପ୍): କେନ୍ଦ୍ରାପଡ଼ା
ଭଲିବଲ୍ (ବାଳିକା – ୧୪ ବର୍ଷରୁ କମ୍)
* ବିଜେତା (ଚାମ୍ପିଅନ୍ସ): ଖୋର୍ଦ୍ଧା
* ଉପ-ବିଜେତା (ରନର୍ସ-ଅପ୍): କଳାହାଣ୍ଡି
ସିଏମ ଟ୍ରଫି ୨.୦ର ସଫଳତା ଏହାର ପ୍ରଥମ ସଂସ୍କରଣର ସଫଳତା ଉପରେ ଆଧାରିତ। ପ୍ରଥମ ସଂସ୍କରଣ, ଯାହାକି କେବଳ ଫୁଟବଲ୍ରେ ଆୟୋଜିତ ହୋଇଥିଲା, ସେଥିରେ ଓଡ଼ିଶାର ପ୍ରାୟ ୬,୦୦୦ ପ୍ରତିଯୋଗୀ ଅଂଶଗ୍ରହଣ କରିଥିଲେ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ପ୍ରତିଯୋଗିତା ଏକ ପ୍ରଭାବଶାଳୀ ପ୍ରତିଭା ଚିହ୍ନଟ ମଞ୍ଚ ଭାବରେ କାର୍ଯ୍ୟ କରିଥିଲା, ଯାହାଫଳରେ ରାଜ୍ୟର କ୍ରୀଡ଼ା କାର୍ଯ୍ୟକ୍ରମ ଅଧୀନରେ ଅଧିକ ପ୍ରଶିକ୍ଷଣ ଓ ବିକାଶ ପାଇଁ ୫୦ରୁ ଅଧିକ ପ୍ରତିଶ୍ରୁତିବଦ୍ଧ ଯୁବ ଫୁଟବଲରଙ୍କୁ ଚୟନ କରାଯାଇଥିଲା ।
ପ୍ରଥମ ସଂସ୍କରଣର ସଫଳତାରେ ଉତ୍ସାହିତ ହୋଇ କ୍ରୀଡ଼ା ଓ ଯୁବସେବା ବିଭାଗ ଚଳିତ ବର୍ଷ ଏହି ପ୍ରତିଯୋଗିତାର ପରିସରକୁ ବୃଦ୍ଧି କରି ଏଥିରେ ଏକାଧିକ ଦଳଗତ କ୍ରୀଡ଼ାକୁ ସାମିଲ କରିଛି, ଯାହାଦ୍ୱାରା ଯୁବ ଖେଳାଳିମାନଙ୍କର ଏକ ବଡ଼ ଗୋଷ୍ଠୀ ନିଜର ଦକ୍ଷତା ପ୍ରଦର୍ଶନ କରିବାକୁ ଏବଂ ଏକ ସୁସଂଗଠିତ ସ୍ତରରେ ପ୍ରତିଦ୍ୱନ୍ଦ୍ୱିତା କରିବାକୁ ସକ୍ଷମ ହୋଇଛନ୍ତି ।
ଏହି ପ୍ରତିଯୋଗିତା କେବଳ ଆଶାୟୀ ଖେଳାଳିମାନଙ୍କୁ ଏକ ପ୍ରତିଯୋଗିତାମୂଳକ ମଞ୍ଚ ପ୍ରଦାନ କରିନାହିଁ, ବରଂ କ୍ରୀଡ଼ା ବିକାଶ ପ୍ରତି ଓଡ଼ିଶାର ଆଥଲେଟ୍-କେନ୍ଦ୍ରିକ ଆଭିମୁଖ୍ୟକୁ ମଧ୍ୟ ଦୃଢ଼ କରିଛି । ବ୍ୟବସ୍ଥିତ ସ୍କାଉଟିଂ ଏବଂ ମୂଲ୍ୟାଙ୍କନ ମାଧ୍ୟମରେ, ପ୍ରତିଯୋଗିତା ସମୟରେ ଚିହ୍ନଟ ହୋଇଥିବା ପ୍ରତିଭାବାନ ଖେଳାଳିମାନଙ୍କୁ ଉନ୍ନତ ପ୍ରଶିକ୍ଷଣର ସୁଯୋଗ ପାଇଁ ବିଚାର କରାଯିବ, ଯାହା ରାଜ୍ୟର ଭବିଷ୍ୟତ କ୍ରୀଡ଼ାକୁ ସୁଦୃଢ଼ କରିବାରେ ସହାୟକ ହେବ ।
ସିଏମ ଟ୍ରଫି ୨.୦ର ସଫଳ ସମାପ୍ତି ତୃଣମୂଳ ସ୍ତରରୁ ପ୍ରତିଭାକୁ ପ୍ରୋତ୍ସାହିତ କରିବା ଏବଂ ଯୁବ ଆଥଲେଟ୍ମାନଙ୍କୁ ଉତ୍କର୍ଷତା ଆଡ଼କୁ ଅଗ୍ରସର ହେବା ପାଇଁ ମାର୍ଗ ପ୍ରଶସ୍ତ କରିବା ଦିଗରେ ଓଡ଼ିଶାର ପ୍ରତିବଦ୍ଧତାକୁ ପୁନର୍ବାର ପ୍ରମାଣିତ କରିଛି । ବର୍ଷକୁ ବର୍ଷ ଅଂଶଗ୍ରହଣ ବୃଦ୍ଧି ପାଉଥିବାରୁ, ଆଗାମୀ ପିଢ଼ିର କ୍ରୀଡ଼ା ଚାମ୍ପିଅନମାନଙ୍କୁ ପ୍ରସ୍ତୁତ କରିବା ପାଇଁ ରାଜ୍ୟର ଦୀର୍ଘକାଳୀନ ଦୂରଦୃଷ୍ଟିର ଏହି କାର୍ଯ୍ୟକ୍ରମ ଏକ ମୁଖ୍ୟ ସ୍ତମ୍ଭ ଭାବରେ ଉଭା ହେଉଛି ।