ନୂଆଦିଲ୍ଲୀ: ଜୁନ୍ ୨୧ ତାରିଖରେ ହେବାକୁ ଥିବା NEET-UG ପୁନଃପରୀକ୍ଷା ପୂର୍ବରୁ ତାମିଲନାଡୁ, ଦିଲ୍ଲୀ ଏବଂ ଉତ୍ତରାଖଣ୍ଡରେ ତିନି ଜଣ ଆଶାୟୀ ଆତ୍ମହତ୍ୟା କରିଛନ୍ତି। ପରିବାର ଏବଂ ଅଧିକାରୀମାନେ ଏହି ଦୁଃଖଦ ଘଟଣାଗୁଡ଼ିକୁ ପରୀକ୍ଷା ସମ୍ବନ୍ଧୀୟ ଗମ୍ଭୀର ଚାପ ସହିତ ଯୋଡୁଛନ୍ତି।
କୋଏମ୍ବାଟୁରର କୋଭାଇପୁଡୁରରେ ୧୮ ବର୍ଷୀୟା ଅନୁକୀର୍ତ୍ତନା, ଏଟିମାଡାଇର ଏକାଦଶ ଶ୍ରେଣୀ ପିଲା ଯିଏକି NEET କୋଚିଂ ସେଣ୍ଟରରେ ପଢୁଥିଲେ। ସେ ଘରେ ଅଚେତ ଅବସ୍ଥାରେ ମିଳିଥିଲେ। ପରେ ଘରୋଇ ହସ୍ପିଟାଲରେ ତାଙ୍କର ମୃତ୍ୟୁ ହୋଇଥିଲା।
ସମ୍ପର୍କୀୟମାନେ କହିଛନ୍ତି ଯେ ପୂର୍ବରୁ NEET ବାତିଲ ହେବା ଏବଂ ପୁନଃପରୀକ୍ଷା ଘୋଷଣା ହେବା ପରେ ସେ ବିଚଳିତ ହୋଇଯାଇଥିଲେ। ସେ ବୁଧବାର ଦିନ ସମ୍ପର୍କୀୟମାନଙ୍କୁ ମେସେଜ୍ କରିଥିଲେ: “ମୁଁ NEET ପରୀକ୍ଷା ଦେଇଥିଲି ଏବଂ ମେଡିକାଲ୍ କଲେଜରେ ଯୋଗଦେବାକୁ ଅପେକ୍ଷା କରିଥିଲି, କିନ୍ତୁ ପରୀକ୍ଷା ବାତିଲ ହୋଇଗଲା। ଏବେ ମୁଁ ପୁଣି ଥରେ ପରୀକ୍ଷା ଦେବାକୁ ଭୟ କରୁଛି। ମୋ ବାପା ମୋ ଉପରେ ବହୁତ ଟଙ୍କା ଖର୍ଚ୍ଚ କରିଛନ୍ତି। ମୁଁ ଜାଣିନାହିଁ ଯେ ମୁଁ ତାଙ୍କ ମୁହଁକୁ କିପରି ଦେଖିପାରିବି।”
ତେବେ କୁନିୟାମୁଥୁର ପୋଲିସ ଏକ ମାମଲା ରୁଜୁ କରି ତାଙ୍କ ମୋବାଇଲ୍ ଫୋନ୍ ଜବତ କରିଛି। ତାଙ୍କ ମୃତଦେହକୁ ପୋଷ୍ଟମର୍ଟମ ପାଇଁ ସରକାରୀ ESI ମେଡିକାଲ୍ କଲେଜ ହସ୍ପିଟାଲକୁ ପଠାଇଥିବା ଜଣାପଡ଼ିଛି।
ସେହିପରି ଦକ୍ଷିଣ-ପଶ୍ଚିମ ଦିଲ୍ଲୀର ପାଲମ ଅଞ୍ଚଳରେ ମେ 3 ତାରିଖରେ NEET ପରୀକ୍ଷା ଦେଇଥିବା ୧୯ ବର୍ଷୀୟା ରେଣୁ ତାଙ୍କ ବାସଭବନରେ ମୃତ ଅବସ୍ଥାରେ ଉଦ୍ଧାର ହୋଇଛନ୍ତି। ତାଙ୍କ ବାପା ଜଣେ ସମ୍ପର୍କୀୟଙ୍କ ଶବଦାହରେ ଯୋଗଦେବାକୁ ବାହାରକୁ ଯାଇଥିଲେ। ପୋଲିସ କହିଛି ଯେ ଘଟଣାସ୍ଥଳରୁ ମିଳିଥିବା ଏକ ଆତ୍ମହତ୍ୟା ନୋଟ୍ ତାଙ୍କ ଭାବପ୍ରବଣ ଯନ୍ତ୍ରଣାକୁ ପ୍ରତିଫଳିତ କରୁଛି। ସେ ତାଙ୍କ ପିତାମାତାଙ୍କୁ କ୍ଷମା ମାଗି ଲେଖିଛନ୍ତି ଯେ ସେ ସେମାନଙ୍କ ଆଶା ପୂରଣ କରିପାରି ନାହାଁନ୍ତି।
ଡେରାଡୁନ୍ ପୋଲିସ ଅନୁଯାୟୀ, ୨୩ ବର୍ଷୀୟା ରିଆ, ଯିଏ କି ଦ୍ୱାଦଶ ଶ୍ରେଣୀରେ ୯୬.୭% ନମ୍ବର ରଖି କଲେଜ ଟପର୍ ଥିଲେ। ସେ ତାଙ୍କ ଚନ୍ଦ୍ରବାଣୀ ବାସଭବନରେ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଛନ୍ତି। ଏକ ସୁଇସାଇଡ ନୋଟରେ ସେ ଲେଖିଛନ୍ତି, “ମାଆ ଏବଂ ବାପା, ମୁଁ ତୁମକୁ ଭଲ ପାଏ,” ଏବଂ ପାଠପଢ଼ାରେ ସଫଳତା ପାଇପାରିଲି ନାହିଁ।