ଖାକିକୁ ଖୋଲା ଚ୍ୟାଲେଞ୍ଜ! ବନ୍ଦ ଘରୁ ଉଭାନ ହୋଇଗଲା ୨୦ ଲକ୍ଷର ସମ୍ପତ୍ତି, ଉଡିଗଲା କମିଶନରେଟ୍ ପୋଲିସର ନିଦ…
ଭୁବନେଶ୍ୱର: ସ୍ମାର୍ଟ ସିଟିରେ ଏବେ ଲୁଟେରାଙ୍କ ରାଜ୍। ସାଧାରଣ ଲୋକେ ଘର ଛାଡି ବାହାରକୁ ଯିବାକୁ ଏବେ ଭୟ କଲେଣି। କାରଣ ପୋଲିସର ରାତ୍ରିକାଳୀନ ପାଟ୍ରୋଲିଂ ଏବଂ ସୁରକ୍ଷା ବ୍ୟବସ୍ଥାକୁ ବେଖାତିର କରି ରାଜଧାନୀ ଛାତି ଉପରୁ ଲୁଟେରାମାନେ ଲୁଟି ନେଇଛନ୍ତି ବିପୁଳ ପରିମାଣର ସମ୍ପତ୍ତି। ଗୋଟିଏ କି ଦୁଇଟି ନୁହେଁ, ପାଖାପାଖି ୨୦ ଲକ୍ଷ ଟଙ୍କାର ସୁନାଗହଣା ଓ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଲୁଟ୍ ହେବା ଘଟଣା ସମଗ୍ର ସହରରେ ଚାଞ୍ଚଲ୍ୟ ଖେଳାଇ ଦେଇଛି।
ମିଳିଥିବା ସୂଚନା ଅନୁଯାୟୀ, ଭୁବନେଶ୍ୱର ଉପକଣ୍ଠ ଏୟାରଫିଲ୍ଡ ଥାନା ଅଧିନରେ ଥିବା ଜାମକୋଳି ଗାଁରେ ଶିବଶଙ୍କର ପରିଡାଙ୍କ ଘରେ ଦୁର୍ବୃତ୍ତମାନେ ବେଶ୍ ଚତୁରତାର ସହ ପଶିଥିଲେ। ପରିବାର ଲୋକେ କୌଣସି କାମରେ ଘରେ ତାଲା ପକାଇ ବାହାରକୁ ଯାଇଥିବାର ସୁଯୋଗ ନେଇ ଏହି ବଡ଼ ଧରଣର କଳାକନା ବୁଲାଇଛନ୍ତି ଲୁଟେରା। ଘରର ମୁଖ୍ୟ ଫାଟକର ତାଲା ଭାଙ୍ଗି ଦୁର୍ବୃତ୍ତମାନେ ନିର୍ଭୟରେ ଭିତରେ ପ୍ରବେଶ କରିଥିଲେ। ଏହାପରେ ଆଲମିରା ତାଡି ଗୋଟି ଗୋଟି କରି ସାରା ଜୀବନର ସଞ୍ଚୟକୁ ଏକାଠି କରି ଫେରାର୍ ହୋଇଯାଇଥିଲେ।
ପରିବାର ଲୋକେ ଯେତେବେଳେ ଘରକୁ ଫେରିଲେ, ସାମ୍ନା ଦୃଶ୍ୟ ଦେଖି ସେମାନଙ୍କ ପାଦ ତଳୁ ମାଟି ଖସିଯାଇଥିଲା। କବାଟ ଖୋଲା ପଡିଥିଲା ଏବଂ ଭିତରେ ପଶି ଦେଖିବା ବେଳକୁ ଲକର ସମ୍ପୂର୍ଣ୍ଣ ଭଙ୍ଗା ଯାଇଥିଲା। ଘରର ଆସବାବପତ୍ର ଓ ଲୁଗାପଟା ଏଣେତେଣେ ବିକ୍ଷିପ୍ତ ହୋଇ ପଡିଥିଲା। ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଲୁଟେରାମାନେ ପାଖାପାଖି ୨୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ ମୂଲ୍ୟର ସୁନା ଅଳଙ୍କାର, ନଗଦ ଟଙ୍କା ଏବଂ କିଛି ଦାମୀ ଇଲେକ୍ଟ୍ରୋନିକ୍ସ ସାମଗ୍ରୀ ବୋହି ନେଇଛନ୍ତି।
ଏତେ ବଡ଼ ଲୁଟ୍ ଘଟଣା ସମ୍ପର୍କରେ ଖବର ପାଇବା ପରେ ସ୍ଥାନୀୟ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ୍ ଟିମ୍ ସହାୟତାରେ ଘଟଣାସ୍ଥଳରୁ ଫିଙ୍ଗର ପ୍ରିଣ୍ଟ ଓ ଅନ୍ୟାନ୍ୟ ପ୍ରମାଣ ସଂଗ୍ରହ କରାଯାଉଛି। ଏହା ସହିତ ଲୁଟେରାଙ୍କ ଗତିବିଧି ଜାଣିବା ପାଇଁ ପୋଲିସ ଆଖପାଖ ଅଞ୍ଚଳର ରାସ୍ତାରେ ଲାଗିଥିବା ସିସିଟିଭି ଫୁଟେଜ୍କୁ ଖୁବ୍ କଡ଼ାକଡ଼ି ଭାବେ ଯାଞ୍ଚ କରୁଛି।
