ନୂଆଦିଲ୍ଲୀ:’କକ୍ରୋଚ୍ ଜନତା ପାର୍ଟି’ (CJP) ଜନ୍ତରମନ୍ତର ଠାରେ NEET ପ୍ରଶ୍ନପତ୍ର ଲିକ୍ ଘଟଣାକୁ ନେଇ କରୁଥିବା ବିକ୍ଷୋଭ ପ୍ରତ୍ୟାହାର କରିନେଇଛି । ରବିବାର ଦିନ କେନ୍ଦ୍ର ସରକାର ପକ୍ଷରୁ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଜିତେନ୍ଦ୍ର ସିଂହ ଓ ସିଜେପି ପକ୍ଷରୁ ସୌରଭ ଦାସ ଓ ଆଶୁତୋଷ ରଙ୍କା ମିଳିତ ସାମ୍ବାଦିକ ସମ୍ମିଳନୀରେ ଆନ୍ଦୋଳନ ଶେଷ ହେବାର ଘୋଷଣା କରିଛନ୍ତି । ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପରେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଡ଼. ଜିତେନ୍ଦ୍ର ସିଂହଙ୍କ ସହ କକରୋଚ୍ ଜନତା ପାର୍ଟିର ପ୍ରତିନିଧି ସୌରଭ ଦାସ ଓ ଆଶୁତୋଷ ରଙ୍କାଙ୍କ ମଧ୍ୟରେ ଆଲୋଚନା ହୋଇଥିଲା। ଆଲୋଚନା ପରେ ଉଭୟ ପକ୍ଷର ସହମତିକ୍ରମେ ଚାଲିଥିବା ଆନ୍ଦୋଳନ ଶେଷ ହେବାର ଘୋଷଣା କରାଯାଇଥିଲା।
ଏହି ସାମ୍ବାଦିକ ସମ୍ମିଳନୀରେ ଉଭୟ ପକ୍ଷ ଆନ୍ଦୋଳନ ଶେଷ କରିବାକୁ କେଉଁ କେଉଁ ପ୍ରସଙ୍ଗରେ ସହମତି ପ୍ରକାଶ କରିଥିଲେ, ସେନେଇ ବିସ୍ତୃତ ସୂଚନା ଦିଆଯାଇଛି। ସିଜେପି ନେତାମାନେ କହିଛନ୍ତି ଯେ, ସେମାନଙ୍କର ତିନୋଟି ପ୍ରମୁଖ ଦାବିକୁ ସରକାର ଗ୍ରହଣ କରିଥିବାରୁ ଆନ୍ଦୋଳନ ପ୍ରତ୍ୟାହାର କରିବାକୁ ନିଷ୍ପତ୍ତି ନିଆଯାଇଛି।
ସରକାରଙ୍କ ସହ ଉତ୍ତମ ବିଶ୍ବାସରେ ଆନ୍ଦୋଳନ ପ୍ରତ୍ୟାହାର କରାଯାଇଛି ବୋଲି ପ୍ରବକ୍ତା ଶ୍ରୀ ଦାସ କହିଛନ୍ତି। ଯେଉଁସବୁ ଦାବିଗୁଡ଼ିକ ଉପରେ ସରକାର ରାଜି ହୋଇଛନ୍ତି ତାହା ଶୀଘ୍ର ଧାର୍ଯ୍ୟ ସମୟସୀମା ମଧ୍ୟରେ କାର୍ଯ୍ୟକାରୀ ହେବ ବୋଲି ସେ କହିଛନ୍ତି। ସରକାରଙ୍କ ସହିତ ପରବର୍ତ୍ତୀ ଆଲୋଚନା ୪ ସପ୍ତାହ ପରେ ହେବା ନେଇ ସେ ସୂଚନା ଦେଇଛନ୍ତି। ସରକାର ଆମର ସମସ୍ତ ଦାବି ଗ୍ରହଣ କରିଥିବାରୁ ତୁରନ୍ତ ଆନ୍ଦୋଳନରୁ ଓହରି ଶାନ୍ତିପୂର୍ଣ୍ଣ ଭାବେ ଘରକୁ ଫେରିଯିବା ପାଇଁ ପ୍ରବକ୍ତା ରଙ୍କା କହିଛନ୍ତି।
“ଗତ କିଛି ଦିନ ଧରି, ଆମେ ସରକାରଙ୍କ ସହିତ ଆଲୋଚନା କରୁଛୁ । ସରକାରଙ୍କ ଠାରେ ଆମର ତିନିଟି ଦାବି ଥିଲା, ଯେଉଁଥିରେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ମଧ୍ୟ ଅନ୍ତର୍ଭୁକ୍ତ,” ବୋଲି ରାଙ୍କା କହିଛନ୍ତି । “ଆଜି ଧର୍ମେନ୍ଦ୍ର ପ୍ରଧାନ ଇସ୍ତଫା ଦେଇଛନ୍ତି, ଯାହା ଦ୍ୱାରା ଆମର ପ୍ରଥମ ଦାବି ପୂରଣ ହୋଇଛି,” ବୋଲି ସେ କହିଛନ୍ତି ।
ସିଜେପି ମୁଖପାତ୍ର ସୌରଭ ଦାସ ଆହୁରି କହିଛନ୍ତି, “ଆମର ଦ୍ୱିତୀୟ ଦାବି ଥିଲା ଯେ, ପ୍ରତିବାଦକାରୀଙ୍କ ବିରୁଦ୍ଧରେ ରୁଜୁ ହୋଇଥିବା ଏଫଆଇଆର ପ୍ରତ୍ୟାହାର କରାଯାଉ । ସରକାର ଏଥିରେ ରାଜି ହୋଇଛନ୍ତି । ସରକାର ଆମ ସହିତ ଏଫଆଇଆର ର କପି ବାଣ୍ଟିବେ । ସେମାନେ ସହମତ ହୋଇଛନ୍ତି ଯେ ଭବିଷ୍ୟତରେ ପ୍ରତିବାଦକାରୀଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ହେବ ନାହିଁ ।”
“ଆମେ ସରକାରଙ୍କ ସହିତ ଏକ ଡ୍ରାଫ୍ଟ ସେୟାର କରିଛୁ । ସେମାନେ ମଙ୍ଗଳବାର ସୁଦ୍ଧା ଆମକୁ ସେୟାର କରିବେ । ଆମେ ସରକାରଙ୍କଠାରୁ ଏକ କୋଟି ଟଙ୍କା କ୍ଷତିପୂରଣ ଦାବି କରିଥିଲୁ,” ବୋଲି ରାଙ୍କା କହିଛନ୍ତି ।
କେନ୍ଦ୍ର ମନ୍ତ୍ରୀ ଜେପି ନଡ୍ଡା କହିଛନ୍ତି, “ସୌରଭ ଦାସ ଏବଂ ଆଶୁତୋଷ ରାଙ୍କାଙ୍କ ସହିତ ଏହା ଆମର ତୃତୀୟ ବୈଠକ ଥିଲା । ଆମର ଏକ ଲମ୍ବା ଏବଂ ବିସ୍ତୃତ ଆଲୋଚନା ହୋଇଥିଲା । ପ୍ରଥମ କଥା ହେଉଛି, ଯେ କୌଣସି କାର୍ଯ୍ୟାନୁଷ୍ଠାନ, କୌଣସି ଏଫଆଇଆର ହେବା ଉଚିତ୍ ନୁହେଁ । ସରକାର ଏହାକୁ ଗ୍ରହଣ କରିଛନ୍ତି । ଭବିଷ୍ୟତରେ କୌଣସି କାର୍ଯ୍ୟାନୁଷ୍ଠାନ ହେବ ନାହିଁ ।”
“କ୍ଷତିପୂରଣ ସମ୍ପର୍କରେ ଆମେ ଛାତ୍ରମାନଙ୍କ ପ୍ରତି ସହାନୁଭୂତିଶୀଳ । ଆପଣ ମୋତେ ଏକ ପାଞ୍ଚ-ସୂତ୍ରୀ ଚାର୍ଟର ମଧ୍ୟ ଦେଇଥିଲେ । ଆମେ ଏହା ଉପରେ ବିଚାର କରିବୁ । ମୁଁ ଅନୁଭବ କରୁଛି ଯେ, ସରକାର ସମସ୍ତ ଦାବି ଗ୍ରହଣ କରିଛନ୍ତି ଏବଂ ମୁଁ ପ୍ରତିବାଦକାରୀମାନଙ୍କୁ ଧର୍ମଘଟ ପ୍ରତ୍ୟାହାର କରିବାକୁ ଅପିଲ୍ କରୁଛି ।”
ଧର୍ମେନ୍ଦ୍ର ପ୍ରଧାନ କେନ୍ଦ୍ରୀୟ ମନ୍ତ୍ରିମଣ୍ଡଳରୁ ଇସ୍ତଫା ଦେବା ପରେ ସରକାର ଏବଂ କକ୍ରୋଚ୍ ଜନତା ପାର୍ଟି ମଧ୍ୟରେ ବୈଠକ ହୋଇଥିଲା । ପ୍ରଧାନଙ୍କ ଇସ୍ତଫା ସିଜେପିର ମୁଖ୍ୟ ଦାବି ଥିଲା ।