ନୂଆଦିଲ୍ଲୀ: କରୋନା ମହାମାରୀ ହେତୁ ଲୋକଙ୍କ ଜୀବନଶୈଳୀରେ ପରିବର୍ତ୍ତନ ଆସିଛି ଏବଂ ଏହି ଭାଇରସ୍ ଆମେରିକାର ରାଷ୍ଟ୍ରପତି ନିର୍ବାଚନରେ ମଧ୍ୟ ବହୁତ ପ୍ରଭାବ ପକାଇଛି। ଆମେରିକାର ଅନେକ ସ୍ଥାନରେ ଭୋଟ୍ ପ୍ରତିଶତ ଅଧିକ ଦେଖାଯାଇଥିବାବେଳେ ଅନେକ ଲୋକ କରୋନା ଭୟ ହେତୁ ମତଦାନରୁ ନିଜକୁ ଦୂରେଇ ରଖିଛନ୍ତି।
ତେବେ ଏହି ସମୟ ମଧ୍ୟରେ ଜଣେ ଆମେରିକୀୟ ମହାକାଶଚାରୀ ପୃଥିବୀଠାରୁ ହଜାର ହଜାର କିଲୋମିଟର ଦୂରରେ ଥିବା ମହାକାଶରୁ ଏହି ନିର୍ବାଚନରେ ଭୋଟ୍ ଦେଇଛନ୍ତି। କେଟ୍ ରୁବିନ୍ସ ନାମକ ଏହି ମହାକାଶଚାରୀ ବର୍ତ୍ତମାନ ଏକ ଆନ୍ତର୍ଜାତୀୟ ସ୍ପେସ୍ ଷ୍ଟେସନରେ ଉପସ୍ଥିତ ଅଛନ୍ତି। ନ୍ୟାସନାଲ ଏରୋନେଟିକ୍ସ ସ୍ପେସ୍ ଆଡମିନିଷ୍ଟ୍ରେସନ (ନାସା) ସହିତ ଏକ ବାର୍ତ୍ତାଳାପରେ କେଟ୍ ଏହି ମତଦାନ ପ୍ରକ୍ରିୟା ସମ୍ପର୍କରେ କହିଥିଲେ।
୪୨ ବର୍ଷ ବୟସ୍କା ମହାକାଶଚାରୀ କେଟ୍ କହିଛନ୍ତି ଯେ ଜଣେ ବ୍ୟକ୍ତି ଦେଶ ବାହାରେ ଥାଇ ଭୋଟ୍ ଦେବା ପ୍ରକ୍ରିୟା ସହିତ ଏହା କିଛି ମାତ୍ରାରେ ସମାନ। ସେ କହିଥିଲେ ଯେ ଯେତେବେଳେ ସେ ଫେଡେରାଲ ପୋଷ୍ଟକାର୍ଡ ଆବେଦନ ପୂରଣ କରିଥିଲେ ସେତେବେଳେ ଏହି ପ୍ରକ୍ରିୟା ଆରମ୍ଭ ହୋଇଥିଲା।
ଯେହେତୁ ମହାକାଶଚାରୀମାନେ ସେମାନଙ୍କ ପ୍ରଶିକ୍ଷଣ ପାଇଁ ହ୍ୟୁଷ୍ଟନକୁ ଆସନ୍ତି, ଅଧିକାଂଶ ମହାକାଶଚାରୀମାନେ ଟେକ୍ସାସର ନାଗରିକ ଭାବରେ ଭୋଟ୍ ଦିଅନ୍ତି। କିନ୍ତୁ ଯଦି କୌଣସି ମହାକାଶଚାରୀ ନିଜ ସହରର ନାଗରିକ ଭାବରେ ମହାକାଶରୁ ଭୋଟ୍ ଦେବାକୁ ଚାହାଁନ୍ତି, ତେବେ ସେମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ଅଛି।
FPCAର ଅନୁମୋଦନ ପରେ, ମହାକାଶଚାରୀ ଭୋଟ୍ ପାଇଁ ପ୍ରସ୍ତୁତ ହୁଅନ୍ତି। ମହାକାଶଚାରୀଙ୍କ ନିଜ ସହରର କାଉଣ୍ଟି କିରାଣୀମାନେ ନାସାର ହ୍ୟୁଷ୍ଟନ୍ ସ୍ଥିତ ଜନ୍ସନ୍ ସ୍ପେସ୍ ସେଣ୍ଟରକୁ ଏକ ଟେଷ୍ଟ୍ ବାଲାଟ୍ ପଠାନ୍ତି। ଏହା ପରେ, ଏକ ସ୍ପେସ୍ ଷ୍ଟେସନ୍ ଟ୍ରେନିଂ କମ୍ପ୍ୟୁଟର ସାହାଯ୍ୟରେ, ବାଲାଟ୍ ପୂରଣ ହୋଇପାରିବ କି ନାହିଁ ପରୀକ୍ଷା କରାଯାଇଥାଏ। ଏହା ପରେ ଏହାକୁ କାଉଣ୍ଟି କ୍ଲର୍କଙ୍କ ନିକଟକୁ ପଠାଯାଏ।
ଟେଷ୍ଟ୍ ସମାପ୍ତ ହେବା ପରେ, କ୍ଲର୍କ ଅଫିସ୍ ଦ୍ୱାରା ଏକ ସୁରକ୍ଷିତ ଇଲେକ୍ଟ୍ରୋନିକ୍ ବାଲାଟ୍ ସୃଷ୍ଟି ହୁଏ। ଏହା ପରେ, ମହାକାଶଚାରୀମାନେ ଭୋଟ୍ ଦିଅନ୍ତି ଏବଂ ଏହାକୁ ଇମେଲ୍ ସାହାଯ୍ୟରେ କାଉଣ୍ଟି କର୍ଲକ୍ ଦ୍ୱାରା ଆନୁଷ୍ଠାନିକ ଭାବରେ ରେକର୍ଡ କରାଯାଇଥାଏ। ଏହାର କେବଳ ଗୋଟିଏ ପାସୱାର୍ଡ ରହିଥାଏ ଯାହାକୁ ସରକାରୀ ଅଧିକାରୀ ଦ୍ୱାରା ଖୋଲାଯାଇପାରିବ।
ଉଲ୍ଲେଖନୀୟ କଥା ହେଉଛି, କେଟ୍ ଦ୍ୱିତୀୟ ଥର ପାଇଁ ମହାକାଶରୁ ଭୋଟ୍ ଦେଇଛନ୍ତି। ଏହାପୂର୍ବରୁ ସେ ୨୦୧୬ ମସିହାରେ ସେ ମତଦାନ କରିଥିଲେ ଯେଉଁଥିରେ ଡୋନାଲ୍ଡ ଟ୍ରମ୍ପ ପ୍ରଥମ ଥର ପାଇଁ ରାଷ୍ଟ୍ରପତି ଭାବେ ନିର୍ବାଚିତ ହୋଇଥିଲେ।