ଦିଶପୁର: ଗତ ଦୁଇ ଦିନ ତଳେ ମୁସଲିମ ବିବାହ ଏବଂ ଛାଡପତ୍ର ପଞ୍ଜୀକରଣ ଆଇନ, ୧୯୩୫କୁ ରଦ୍ଦ କରିଛନ୍ତି ଆସାମ ସରକାର । କ୍ୟାବିନେଟ ବୈଠକରେ ୮୯ ବର୍ଷ ପୁରୁଣା ଆଇନକୁ ରଦ୍ଦ କରିବାକୁ ନିଷ୍ପତ୍ତି ନିଆଯାଇଛି । ତେବେ କ’ଣ ଏହି ନିୟମ? ମୁସଲମାନମାନଙ୍କ ପାଇଁ ଏଥିରେ କ’ଣ ଥିଲା ବ୍ୟବସ୍ଥା? କାହିଁକି ଏହାକୁ ସରକାର ରଦ୍ଦ କରିବାକୁ ନିଷ୍ପତ୍ତି ନେଲେ? ଆସନ୍ତୁ ଜାଣିବା ସେ ବିଷୟରେ …
୧୯୩୫ରେ ଆସାମ ମୁସଲିମ ବିବାହ ଏବଂ ଛାଡପତ୍ର ପଞ୍ଜୀକରଣ ଆଇନ କାର୍ଯ୍ୟକାରୀ କରାଯାଇଥିଲା । ଯେଉଁଥିରେ ମୁସଲମାନମାନଙ୍କର ବିବାହ ଏବଂ ଛାଡପତ୍ର ପଞ୍ଜିକରଣ ପାଇଁ ଏକ ବ୍ୟବସ୍ଥା ଥିଲା । ୨୦୧୦ ରେ ଏହି ଅଧିନିୟମ ସଂଶୋଧିତ ହୋଇଥିଲା | ‘ସ୍ୱେଚ୍ଛାସେବୀ’ ଶବ୍ଦ ସ୍ଥାନରେ ‘ବାଧ୍ୟତାମୂଳକ’ ଶବ୍ଦ ଯୋଗ କରାଯାଇଥିଲା | ଏହି ସଂଶୋଧନ ପରେ ଆସାମରେ ମୁସଲମାନମାନଙ୍କର ବିବାହ ଏବଂ ଛାଡପତ୍ର ପଞ୍ଜିକରଣ ବାଧ୍ୟତାମୂଳକ କରାଯାଇଥିଲା ।
ଏହି ଆଇନରେ ସମସ୍ତ ମୁସଲମାନ ବ୍ୟକ୍ତି ମାନଙ୍କୁ ବିବାହ ଏବଂ ଛାଡପତ୍ର ପଞ୍ଜିକରଣ ପାଇଁ ରାଜ୍ୟକୁ ଲାଇସେନ୍ସ ପ୍ରଦାନ କରିବାର ଅଧିକାର ପ୍ରଦାନ କରିଥିଲେ । ଏହି ଲାଇସେନ୍ସ କେବଳ ସରକାରୀ ମୁସଲିମ ରେଜିଷ୍ଟ୍ରାର କର୍ମଚାରୀଙ୍କ ଦ୍ଵାରା ପ୍ରଦାନ କରାଯାଇପାରିବ । ଏହି ଅଧିନିୟମରେ ମୁସଲମାନମାନଙ୍କ ଦ୍ୱାରା ବିବାହ ଏବଂ ଛାଡପତ୍ର ସମ୍ବନ୍ଧୀୟ ଆବେଦନର ପ୍ରକ୍ରିୟା ଏବଂ ବ୍ୟବସ୍ଥା ବିଷୟରେ ବିସ୍ତୃତ ଭାବରେ ଉଲ୍ଲେଖ କରାଯାଇଛି ।
ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ଵସର୍ମା କହିଛନ୍ତି ଯେ ଏହି ଆଇନରେ ଏପରି ବ୍ୟବସ୍ଥା ଅଛି, ଯେଉଁଥିପାଇଁ ନାବାଳିକାମାନଙ୍କୁ ମଧ୍ୟ ବିବାହ କରିବାର ଅଧିକାର ମିଳିଥିଲା | ବିବାହ ପାଇଁ ଭାରତୀୟ ଆଇନ ଅନୁସାରେ ଯେଉଁ ବୟସ ରହିଛି ସେହି ବୟସ ପୂର୍ବରୁ ସେମାନେ ବିବାହ କରୁଥିଲେ । ଏହି ଆଇନ ରଦ୍ଦ ବାଲ୍ୟ ବିବାହକୁ ପ୍ରୋତ୍ସାହନ ଦେଉଥିବା କାର୍ଯ୍ୟକୁ ମଧ୍ୟ ରଦ୍ଦ କରିବା ।
ଗତ ବର୍ଷ ଆସାମ ସରକାର ବାଲ୍ୟ ବିବାହ ଉପରେ ବ୍ୟାପକ କଟକଣା ଆରମ୍ଭ କରିଥିଲେ ଏବଂ POCSO ଅଧିନିୟମ ଅନୁଯାୟୀ ଅତି କମରେ ୪,୦୦୦ ଲୋକଙ୍କୁ ଗିରଫ କରିଥିଲେ। ୨୦୨୬ ସୁଦ୍ଧା ବାଲ୍ୟ ବିବାହକୁ ସମ୍ପୂର୍ଣ୍ଣ ନିଷିଦ୍ଧ କରିବାକୁ ରାଜ୍ୟ ସରକାର ଲକ୍ଷ୍ୟ ଧାର୍ଯ୍ୟ କରିଛନ୍ତି।
ଆସାମ ମୁସଲିମ ବିବାହ ଏବଂ ଛାଡପତ୍ର ପଞ୍ଜୀକରଣ ଅଧିନିୟମ ୧୯୩୫ ଅନୁଯାୟୀ, ଯଦି କୌଣସି ପୁଅ କିମ୍ବା ଝିଅ ନାବାଳକ ହୋଇଥିବେ କିମ୍ବା ଉଭୟ ନାବାଳକ ହୋଇଥିବେ, ତେବେ ସେମାନଙ୍କ ଆଇନଗତ ଅଭିଭାବକମାନେ ସେମାନଙ୍କ ନାମରେ ଛାଡପତ୍ର କିମ୍ବା ବିବାହ ପଞ୍ଜୀକରଣ ପାଇଁ ଆବେଦନ କରିପାରିବେ । ରାଜ୍ୟ ସରକାରଙ୍କ ଅନୁସାରେ ଏହି ବ୍ୟବସ୍ଥା ବାଲ୍ୟ ବିବାହକୁ ପ୍ରୋତ୍ସାହନ ଦେଉଥିଲା । ବର୍ତ୍ତମାନ ଏହି ନିୟମ ରଦ୍ଦ ହେବା ପରେ ମୁସଲମାନମାନଙ୍କୁ ସେମାନଙ୍କର ବିବାହକୁ ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ପଞ୍ଜୀକୃତ କରିବାକୁ ପଡିବ।