ନୂଆଦିଲ୍ଲୀ: ଏକଦା ସଂସଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ, ସେ ଏକୁଟିଆ ବିରୋଧୀଙ୍କ ଉପରେ ଭାରି ପଡ଼ିବେ। ଅର୍ଥାତ ସମସ୍ତ ବିରୋଧୀ ଯଦିବି ଏକାଠି ହେବେ ତାହାଲେ ତାଙ୍କୁ ମୁକାବିଲା କରିପାରିବେ ନାହିଁ। ମୋଦୀଙ୍କ ଏହି ପରିଭାଷା କିନ୍ତୁ ଏବେ ବଦଳିଯାଇଛି। ବିରୋଧୀ ୨୪ରୁ ଅଧିକ ଦଳଙ୍କୁ ନେଇ ୨୦୨୪ ପାଇଁ ପ୍ରସ୍ତୁତି କରୁଥିବା ବେଳେ ବିଜେପି ନେତୃତ୍ବାଧୀନ ଏନଡିଏ ବିଭିନ୍ନ ପୁରୁଣା ସହଯୋଗୀ ଦଳ ଏବଂ ନୂଆ ଦଳକୁ ନିଜ ପଟରେ ରଖିବାକୁ ଉଦ୍ଯମ କରିଛି।
ବିରୋଧୀ ଦଳ ବିରୋଧରେ ଏନଡିଏ ଶକ୍ତି ପ୍ରଦର୍ଶନ କରିବାକୁ ଯାଇ ଗୋଟିଏ ସପ୍ତାହରେ ୬ ଟି ନୂଆ ଦଳ ଯୋଡିଛି ବିଜେପି। ଏନଡିଏ ସହିତ ଏହି ଦଳଗୁଡିକରେ ଯୋଗଦେବା ସହିତ ବିଜେପି ଅନେକ ରାଜ୍ୟର ଜାତି ସମୀକରଣକୁ ମଧ୍ୟ ବଦଳାଇ ଦେଇଛି।ଏଭଳି ପରିସ୍ଥିତିରେ ପ୍ରଶ୍ନ ଉଙ୍କି ମାରୁଛି ଯେ ବିରୋଧୀ ଏକତାର ଦ୍ୱିତୀୟ ବୈଠକ ପୂର୍ବରୁ କେଉଁ ରାଜ୍ୟରେ ଏନଡିଏ ଜାତି ସମୀକରଣ ପରିବର୍ତ୍ତନ କରିଛି ଏବଂ ଏହା ବିରୋଧୀଙ୍କ ପାଇଁ କେତେ କ୍ଷତି ଘଟାଇପାରେ?
ଗୋଟିଏ ସପ୍ତାହରେ ଏନଡିଏ ଯୋଡ଼ିଲା ୬ଟି ନୂଆ ଦଳ
ବିରୋଧୀଙ୍କ ପାଟନା ସଭାରେ ଯୋଗ ଦେଇଥିବା ଅନେକ ଦଳ ଦ୍ୱିତୀୟ ବୈଠକ ପୂର୍ବରୁ ଏନଡିଏ ସହ ହାତ ମିଳାଇଛନ୍ତି। ଏହା ପରେ ମହାରାଷ୍ଟ୍ର, ବିହାର ଏବଂ ଉତ୍ତରପ୍ରଦେଶର ଏହି ତିନୋଟି ରାଜ୍ୟରେ ବିଜେପି ନୂଆ ସହଯୋଗୀ ପାଇଛି। ଏନଡିଏରେ ପୂର୍ବରୁ ୨୪ଟି ପାର୍ଟି ଥିଲା। ବର୍ତ୍ତମାନ ୬ଟି ନୂଆ ପାର୍ଟି ଯୋଗ ହେବା ପରେ ଏହି ପାର୍ଟିରେ ପାର୍ଟି ସଂଖ୍ୟା ୩୦ କୁ ବୃଦ୍ଧି ପାଇଛି। ଏହି ନୂଆ ଦଳର ନାମ ହେଉଛି ଅଜିତ ପାଓ୍ବାରଙ୍କ ଗୋଷ୍ଠୀର ଏନସିପି, ଲୋକ ଜନକ୍ଷେତ୍ର ପାର୍ଟି (ଚିରାଗ ଦଳ), ଜେଡିୟୁ ସହଯୋଗୀ ହିନ୍ଦୁସ୍ତାନ ଆୱାମ ମୋର୍ଚା, ଆରଏଲଏସପି (ଉପେନ୍ଦ୍ର କୁଶୱା), ଭିଭିଆଇପି (ମୁକେଶ ସାହନି) ଏବଂ ସୁଭାସପା (ଓମପ୍ରକାଶ ରାଜଭାର)।
ପୂର୍ବରୁ ୨୪ଟି ଦଳ ଏନଡିଏରରେ ଥିଲେ
ଶିବସେନା ସିନ୍ଦେ ଦଳ, ଏଆଇଏଡିଏମକେ, ଏପିପି,ଏଡିପିପି, ଜେଜେପି, ଏସକେଏମ, ବିପିପି, ଆଇଏମକେଏମକେ, ଆଇଟିଏଫଟି, ଏଜେଏସୟୁ,ଏମଏନଏଫ, ତାମିଲ ମାନିଲା କଂଗ୍ରେସ, ପିଏମକେ, ଆପନା ଦଳ ସେକ୍ଯୁଲାର, ଏମଜିପିଏସ, ଏଜିପି, ଏଲଜିପି, ନିଶାଦ ପାର୍ଟି, ୟୁପିପିଏସ, ଅଲ ଇଣ୍ଡିଆ ଏନଆର କଂଗ୍ରେସ ପୁଡୁଚେରୀ, ଅକାଳୀ ଦଳ ଦିଦସା, ଆରପିଆଇର ଜନସେନା ଏବଂ ପୱନ କଲ୍ୟାଣ ।
ବିଭିନ୍ନ ରାଜ୍ୟରେ ସମୀକରଣ ବଦଳାଇବାକୁ ବିଜେପିର ପ୍ରୟାସ
ଉତ୍ତରପ୍ରଦେଶ: ୩୨ ଟି ଲୋକସଭା ଆସନ ପ୍ରଭାବିତ ହେବ। ଓବିସି ନେତାଙ୍କ ମଧ୍ୟରେ ଏକ ବଡ଼ ଚେହେରା ଭାବେ ବିବେଚିତ ଓମ ପ୍ରକାଶ ରାଜଭାର ଗତ ଶନିବାର ଏନଡିଏରେ ଯୋଗ ଦେଇଛନ୍ତି। ୨୦୨୪ ଲୋକସଭା ନିର୍ବାଚନ ପୂର୍ବରୁ ରାଜଭାରଙ୍କ ଏନଡିଏରେ ଯୋଗଦେବା ବିଜେପିର ନିର୍ବାଚନ ପ୍ରଚାରକୁ ଆହୁରି ମଜବୁତ କରିବ। ଓବିସି ଜନଗଣନା ସମେତ ଅନେକ ପ୍ରସଙ୍ଗ ଉଠାଇ ବିରୋଧୀମାନେ କ୍ରମାଗତ ଭାବରେ ବିଜେପିକୁ ଘେରି ରହିଛନ୍ତି। ଏଭଳି ପରିସ୍ଥିତିରେ ଓମ ପ୍ରକାଶ ରାଜଭାର ୟୁପିରେ ଥିବା ପ୍ରାୟ ୩୨ଟି ଲୋକସଭା ଆସନ ଉପରେ ନିଜର ପ୍ରଭାବ ଦାବି କରିଛନ୍ତି ଏବଂ ଯଦି ତାଙ୍କ ଦଳ ବିଜେପି ସହ ମିଶି ଭଲ ପ୍ରଦର୍ଶନ କରିବ ତାହେଲେ ୟୁପିରେ ବିରୋଧୀ ଏକ ପ୍ରକାର ଚିତ ହେବେ।
ବିହାର: ଏନଡିଏ ସହିତ ୪ ନେତା, ଜାତି ସମୀକରଣ ପରିବର୍ତ୍ତନ ହେବ। ଏଲଜେପି (ଚିରାଗ ପାସୱାନ୍) ଏନଡିଏରେ ସାମିଲ ହୋଇଛନ୍ତି। ବିହାରର ଦଳିତ ଆସନ ଉପରେ ଏହି ଦଳର ମଜବୁତ ସ୍ଥିତି ରହିଛି। ୨୦୧୪ ଏବଂ ୨୦୧୯ ଲୋକସଭା ନିର୍ବାଚନରେ ଏଲଜେପି ବିହାରରେ ୬ଟି ଆସନ ଜିତିଥିଲା ଏବଂ ୬-୭ ଟି ଆସନରେ ବିଜେପିକୁ ମଧ୍ୟ ସାହାଯ୍ୟ କରିଥିଲା।
ଆନ୍ଧ୍ରପ୍ରଦେଶ ଏବଂ ପଞ୍ଜାବରେ ସମାନ ଦଳ ଦୁର୍ବଳ
ଆନ୍ଧ୍ରପ୍ରଦେଶର ଚନ୍ଦ୍ରବାବୁ ନାଇଡୁ ୨୦୧୮ରେ ଏନଡିଏ ଛାଡିଛନ୍ତି। ଯଦିଓ ଚନ୍ଦ୍ରବାବୁ ନାଇଡୁଙ୍କ ଟିଡିପି ଏନଡିଏ ଛାଡିବା ପରେ ୨୦୧୯ ରେ ଅନୁଷ୍ଠିତ ଲୋକସଭା ନିର୍ବାଚନରେ ହାରିଛି, ଏବେ ଏହି ଦଳ ଏନଡିଏକୁ ଫେରିବାକୁ ଚାହୁଁଛି। ଚଳିତ ବର୍ଷ ଜୁନ୍ ପ୍ରଥମ ସପ୍ତାହରେ ଚନ୍ଦ୍ରବାବୁ ନାଇଡୁ ଅମିତ ଶାହା ଏବଂ ଜେପି ନଡାଙ୍କୁ ମଧ୍ୟ ଭେଟିଥିଲେ।
ପଞ୍ଜାବରେ ୨୦୨୦ ମସିହାରେ କୃଷକଙ୍କ ଆନ୍ଦୋଳନ ସମୟରେ ସୁଖବୀର ସିଂ ବାଦଲଙ୍କ ଅକାଳୀ ଦଳ ନିଜକୁ ଏନଡିଏଠାରୁ ଅଲଗା କରିଥିଲା। କିନ୍ତୁ ୨୦୨୨ ମସିହାରେ ଅନୁଷ୍ଠିତ ବିଧାନସଭା ନିର୍ବାଚନରେ ଅକାଳୀ ଦଳ ପରାସ୍ତ ହୋଇଥିଲା ଏବଂ ବର୍ତ୍ତମାନ ଏହି ଦଳ ଆଗାମୀ ଲୋକସଭା ନିର୍ବାଚନରେ ବିଜେପି ସହ ହାତ ମିଳାଇବାକୁ ଚାହୁଁଛି। ଅନ୍ଯପଟେ ପଞ୍ଜାବର ଅନେକ ଭେଟେରାନ କଂଗ୍ରେସ ନେତା ମଧ୍ଯ ବିଜେପିରେ ସାମିଲ ହୋଇଛନ୍ତି।
ଏନଡିଏ ଓ ବିରୋଧୀ ଶିବିରଠୁ ଦୂରେଇ ରହିଛନ୍ତି ଏହି ସବୁ ଦଳ
ବିଜୁ ଜନତା ଦଳ, ଆନ୍ଧ୍ରପ୍ରଦେଶର ଓ୍ୱାଇଏସଆର କଂଗ୍ରେସ, ବିଏସପି, ଅକାଳୀ ଦଳ, ତେଲୁଗୁ ଦେଶମ ପାର୍ଟି ଏବଂ ବିଆରଏସ। କାହା ସହିତ ଏହି ଦଳ ସମର୍ଥନ କରିବେ ସେ ନେଇ ନିଜର ଆଭିମୁଖ୍ୟ ସ୍ପଷ୍ଟ କରି ନାହାନ୍ତି। ଏହି ଦଳଗୁଡିକରେ ବର୍ତ୍ତମାନ ଲୋକସଭାରେ ୫୦ ରୁ ଅଧିକ ସାଂସଦ ଅଛନ୍ତି। ନିର୍ବାଚନ ଫଳାଫଳ ପରେ ଏହି ଦଳଗୁଡ଼ିକ ସେମାନଙ୍କର କାର୍ଡ ଖୋଲିପାରିବେ ବୋଲି ଆଶା କରାଯାଉଛି।