ନୂଆଦିଲ୍ଲୀ: ଭାରତର ଅଧ୍ୟକ୍ଷତାରେ ଜି-୨୦ ଶିଖର ସମ୍ମିଳନୀର ଅଭୂତପୂର୍ବ ସଫଳତା ଏବଂ ବୈଶ୍ୱିକ ସମସ୍ୟାର ସମାଧାନରେ ଭାରତର ଅଗ୍ରଣୀ ଭୂମିକାକୁ ସମଗ୍ର ବିଶ୍ୱରେ ପ୍ରଶଂସା କରାଯାଇଛି। ଜି-୨୦ ଶିଖର ସମ୍ମିଳନୀ ପରେ ଭାରତର ସଂସଦ ଆଉ ଏକ ଗୁରୁତ୍ୱପୂର୍ଣ୍ଣ ସମାବେଶ ଆୟୋଜନ କରିବାକୁ ପ୍ରସ୍ତୁତ ହେଉଛି ଏବଂ ତାହା ହେଉଛି- ‘ପି-୨୦’ ବା ଜି-୨୦ ସଂସଦୀୟ ବାଚସ୍ପତି ଶିଖର ସମ୍ମିଳନୀ।
ପୁଣିଥରେ ଦିଲ୍ଲୀରେ ସାରା ବିଶ୍ୱରୁ ନେତାଙ୍କ ସମାବେଶ ହେବ। ଆସନ୍ତାକାଲିଠାରୁ ଦୁଇ ଦିନିଆ ପି-୨୦ (P-20) ଶିଖର ସମ୍ମିଳନୀ ଆୟୋଜିତ ହେବ। ଅକ୍ଟୋବର ୧୩ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାର ଉଦଘାଟନ କରିବେ। ଜି-୨୦ ଦେଶ ବ୍ୟତୀତ ଅନ୍ୟ ଦେଶର ସଂସଦର ବାଚସ୍ପତି ଏବଂ ଆନ୍ତର୍ଜାତୀୟ ସଂଗଠନର ପ୍ରତିନିଧୀମାନେ ପି-୨୦ ଶିଖର ସମ୍ମିଳନୀରେ ଅଂଶଗ୍ରହଣ କରିବେ। ଜି-୨୦ର ବଡ ସଫଳତା ପରେ, ଭାରତରେ ପ୍ରଥମ ଥର ପାଇଁ ଅନୁଷ୍ଠିତ ଏହି ପି-୨୦ ସମ୍ମିଳନୀ। ଦିଲ୍ଲୀର ଦ୍ୱାରକାସ୍ଥିତ ଇଣ୍ଡିଆ ଇଣ୍ଟରନ୍ୟାସନାଲ କନଭେନସନ୍ ଏବଂ ଏକ୍ସପୋ ସେଣ୍ଟର ‘ଯଶଭୂମି’ରେ ଆୟୋଜିତ ହେବ। ଏହା ହେଉଛି ପି-୨୦ ଶିଖର ସମ୍ମିଳନୀର ନବମ ସଂସ୍କରଣ।
ଏହି ସମ୍ମିଳନୀ ଇଣ୍ଡିଆ ଇଣ୍ଟରନ୍ୟାସନାଲ କନଭେନସନ୍ ଓ ଯଶୋଭୂମିର ଏକ୍ସପୋ ସେଣ୍ଟରରେ ଆସନ୍ତା ଅକ୍ଟୋବର ୧୨ରୁ ୧୪ ପର୍ଯ୍ୟନ୍ତ ଆୟୋଜିତ ହେବ। ” ଅକ୍ଟୋବର ୧୨ରେ ଯଶୋଭୂମି ଠାରେ ପାର୍ଲାମେଣ୍ଟାରୀ ଫୋରମ୍ ଅଫ୍ ଲାଇଫ୍ ଷ୍ଟାଇଲ୍ ଫର ଏନଭାରନମେଣ୍ଟ (LiFE) ଏକ ପ୍ରି-ସମ୍ମିଟ ଅନୁଷ୍ଠିତ ହେବ। ‘ମଦର ଡେମୋକ୍ରାସି’ ନାମକ ଏକ ପ୍ରଦର୍ଶନୀ ମଧ୍ୟ ଆୟୋଜିତ ହେବ। ଯେଉଁଥିରେ ଭାରତର ପ୍ରାଚୀନ ତଥା ଗଣତାନ୍ତ୍ରିକ ପରମ୍ପରାକୁ ଆଲୋକିତ କରାଯିବ ବୋଲି ବିର୍ଲା କହିଛନ୍ତି। ପି-୨୦ ଶିଖର ସମ୍ମିଳନୀରେ ଚାରୋଟି ଅଧିବେଶନ ଅନୁଷ୍ଠିତ ହେବ। ଏଥିରେ ମହିଳାଙ୍କ ନେତୃତ୍ବରେ ପବ୍ଲିକ ଡିଜିଟାଲ ପ୍ଲାଟଫର୍ମରେ ଲୋକଙ୍କ ବିକାଶ, SDG ଗୁଡ଼ିକୁ ତ୍ବରାନ୍ବିତ କରିବା ଏବଂ ସ୍ଥାୟୀ ଶକ୍ତି ପରିବର୍ତ୍ତନ ସମ୍ପର୍କରେ ଏହି ଅଧିବେଶନରେ ଆଲୋଚନା କରାଯିବ ।
ପି-୨୦ରେ ଜି-୨୦ ଏବଂ ଆମନ୍ତ୍ରିତ ରାଷ୍ଟ୍ରମାନେ ସଂସଦର ବାଚସ୍ପତି ବା ଅଧ୍ୟକ୍ଷ ପଦାଧିକାରୀମାନେ ଏକତ୍ରିତ ହେବେ। ସଂସଦ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ସଂସ୍ଥା, ଯାହା ମାଧ୍ୟମରେ ଜନପ୍ରତିନିଧିମାନେ ସଦନରେ ଜନସାଧାରଣଙ୍କ ଆଶାଆକାଂକ୍ଷା ଉପସ୍ଥାପନ କରନ୍ତି ଏବଂ ଆଇନ ଓ ନୀତି ପ୍ରଣୟନ କରନ୍ତି। ପି-୨୦ ସମ୍ମିଳନୀରେ ଭାରତୀୟ ସଂସଦ ବିଶ୍ୱ ଓ ମାନବିକତା ସମ୍ମୁଖୀନ ହେଉଥିବା ଗୁରୁତ୍ୱପୂର୍ଣ୍ଣ ସମସାମୟିକ ସମସ୍ୟାର ସମାଧାନ ପାଇଁ ଏକ ସାଧାରଣ ଦୃଷ୍ଟିକୋଣ ବିକଶିତ କରିବାକୁ ଚେଷ୍ଟା କରିବ। ଭାରତରେ ପି-୨୦ ସମ୍ମିଳନୀ ଆୟୋଜନର ଗୁରୁତ୍ୱ ବୃଦ୍ଧି ପାଇଛି, କାରଣ ବିଶ୍ୱସ୍ତରୀୟ ପ୍ରସଙ୍ଗରେ ସହମତି ମାନବତାର ସାଧାରଣ ଭବିଷ୍ୟତ ସହ ଜଡ଼ିତ। ପି-୨୦ ସମ୍ମିଳନୀରେ ଦୀର୍ଘସ୍ଥାୟୀ ବିକାଶ ଲକ୍ଷ୍ୟ, ଜଳବାୟୁ ପରିବର୍ତ୍ତନ, ମହିଳାଙ୍କ ନେତୃତ୍ୱାଧୀନ ବିକାଶ ଏବଂ ମାନବ ଜାତିର ମିଳିତ ଭବିଷ୍ୟତ ଉପରେ ଗୁରୁତ୍ୱ ଦିଆଯିବ। ଏଥିରେ ପରିବେଶ ଅନୁକୂଳ ଜୀବନଶୈଳୀ ଅର୍ଥାତ୍ ‘ମିଶନ ଲାଇଫ୍’ ସହ ଜଡ଼ିତ ବିଷୟ ଉପରେ ମଧ୍ୟ ଆଲୋଚନା କରାଯିବ।