ପ୍ରେମଲତା ସାହୁ 
କରୁଣାକର ହେ କରୁଣା ହେଉ !
ତୁମ୍ଭ ନାମ ଜପି ଜୀବନ ଯାଉ
କରୁଣାକର ହେ କରୁଣା ହେଉ ! ।୦।
ତୋତେ ଦେଖିବାକୁ ମନ ଉଚ୍ଛନ୍ନ,
ନିତି ରଜନୀରେ ଦେଖେ ସପନ,
ଫୁଲେଇ ହେଉ
ଗେହ୍ଲେଇ ହେଉ
ମୁରୁକି ମୁରୁକି ତୁ ହସୁଥାଉ
କରୁଣାକର ହେ କରୁଣା ହେଉ ! ।୦୧।
ଭକତିର ଦୀପ ଜାଳୁଛି ମୁହିଁ,
ଆଖିର ଲୁହକୁ ଘୃତ ସଜାଇ,
ଧୈର୍ଯ୍ୟ ଵଳିତା
ରଖିଛି ଧାତା
କେତେ ମୁଁ’ ଡାକିବି ହେ ମହାବାହୁ !
କରୁଣାକର ହେ କରୁଣା ହେଉ ! ।୦୨।
ଆମ୍ଭ ଆଡେ ଟିକେ ହେଉ ନଜର
ରଙ୍କୁଣିରତନ କମଳାଵର,
ତୁମ୍ଭରି ବିନା
ଦିନ ସରେନା
କାହାକୁ ଦିଶେନା ମୋତେ ତ ଆଉ
କରୁଣାକର ହେ କରୁଣା ହେଉ ! ।୦୩।
ଶିକ୍ଷୟିତ୍ରୀ, କନ୍ଧମାଳ