କୁଞ୍ଜବିହାରୀ ସାହୁ
ଦେଖରେ ଦେଖରେ ବିଷୁବ ସଂକ୍ରାନ୍ତି
ଆସିବାର ଦେଖି ବସନ୍ତ
ପବନଟା ଏବେ ଉଭେଇଗଲାଣି
ତାତି ଖରା ଟାଣେ ପଣତ ।
ଝାଞ୍ଜି ବହିଲାଣି ସହି ହେଉନାହିଁ
ବିଷୁବର ଟାଣଖରାରେ,
ପଣା ପିଇବାରେ ମଜା ରହିଅଛି
ଏଇ ବଇଶାଖୀ ଧରାରେ ।
ବିଷୁବରେଖାକୁ ଡେଇଁ ଡେଇଁ ଗଲା
ଉତ୍ତର ଦିଗକୁ ସୂରୁଜ,
ସେଥିପାଇଁ ପରା ମରତେ ପଡ଼ିଛି
ତତଲା ଧୋବଲା ମୂରୁଜ ।
ତୁଳସୀ ଗଛରେ ଜେଜିମା ବାନ୍ଧିଛି
ବସୁନ୍ଧରା ଠେକି ସଜେଇ,
ଭକତି ଭାବରେ ଢାଳିଲା ତହିଁରେ
ସୁଆଦିଆ ପଣା ମଜେଇ । ୩
ଠେକିରୁ ପଡ଼ୁଛି ପଣାରୁ ଟୋପାଏ
ତୁଳସୀ ଗଛର ପତରେ,
ଏମିତି କରିଲେ ବରଷା ଆସିବ
ଜେଜିମା କହିଲା ସତରେ । ୪
ବାରି ବେଲ ଆଣି ବାପା ବନେଇଲେ
ଭରି ଦହି, ଗୁଡ଼, ନଡ଼ିଆ,
ଗୋଲମରିଚକୁ ତହିଁରେ ଢାଳିଲେ
ହେଲା ବେଲପଣା ବଢିଆ ।
ଗାଁ ମୁଣ୍ଡେ ହେଲା ଝାମୁଯାତରାଟି
ଲାଗିଲା ଭକତ ଗହଳ,
ଦେଖିବାକୁ ଗଲି ଝାମୁଯାତରାକୁ
ଗୋଡ଼ କାଢି ଘରୁ ସଅଳ ।
ସଙ୍କଟମୋଚନ ହନୁମାନଙ୍କର
ଆନନ୍ଦେ ଭଜନ ଗାଇଲି,
ଆପଦେ ବିପଦେ ସାହା ସେ ହୋଇବେ
ମୁଣ୍ଡିଆ ଗୋଟିଏ ମାଇଲି ।
ହିନ୍ଦୁ ଧରମର ନୂଆ ବରଷଟି
ପଣା ସଂକରାନ୍ତି ପରବ,
ବୋଉ କହିଦେଲା -ଆସରେ ପିଲାଏ
ଖୁସିରେ କରିବା ଗରବ ।
ଭୁବନେଶ୍ବର
୭୦୦୮୧ ୪୨୦୪୦