ଭୁବନେଶ୍ୱର: ହାଣ୍ଡିଶାଳକୁ ମହଙ୍ଗାମାଡ଼ | ପୂର୍ବରୁ ଡାଲି, ଚାଉଳ, ତେଲର ମୂଲ୍ୟ ବଢିଥିବା ବେଳେ ଏବେ ହୁହୁ ହେଇ ବଢୁଛି ପରିବା ଦର | ଭେଣ୍ଡି, ଵିମ, ଅଦା ଓ ରସୁଣ ଦର ତ ଆକାଶ ଛୁଇଁଥିବା ବେଳେ ଏବେ ନିହାତି ଆବଶ୍ୟକ ପରିବା ଆଳୁ ଓ ପିଆଜ ଉପରେ ମହଙ୍ଗା ମାଡ ହୋଇଛି | ସପ୍ତାହକ ଭିତରେ ପିଆଜ ଦର ୧୦ ଟଙ୍କାକୁ ବୃଦ୍ଧି ହୋଇ ୪୦ ଟଙ୍କା ହୋଇଥିବା ବେଳେ ଆଳୁ କିଲୋ ୩୨ ଟଙ୍କାକୁ ବୃଦ୍ଧି ହୋଇଛି | ଯାହାକୁ ନେଇ ଏବେ ଚିନ୍ତାରେ ଖାଉଟି | ଯେଉଁ ପରିବା ୩୦, ୪୦ ରେ ବିକ୍ରି ହେଉଥିଲା ସପ୍ତାହ ମଧ୍ୟରେ ତାହାର ଦର ବଢି ୬୦, ୭୦ ଛୁଇଁଛି | ବଜାରରେ ବାଇଗଣ କିଲୋ ୫୦ ଟଙ୍କା, କଲରା କିଲୋ ୮୦, ପୋଟଳ ୫୦ ଛୁଇଁଥିବା ବେଳେ ପିଆଜ ଦର ୪୦ ଛୁଇଁଛି |
ତେବେ ଗତ କିଛି ଦିନ ମଧ୍ୟରେ ଚାଉଳ, ଡାଲି ଠାରୁ ଆରମ୍ଭ କରି ଅଟା, ତେଲ, ସୁଜି, ମଇଦା ସବୁର ଦର ବୃଦ୍ଧି ପାଇଛି | ଗୋଟେ ପଟେ ଆୟ ନବଢୁଥିବାରୁ ନିତ୍ୟ ଆବଶ୍ୟକ ଜିନିଷର ବଢୁଥିବା ଦାମ ପାଇଁ ଏବେ ଚିନ୍ତାରେ ଖାଉଟି |
ସେପଟେ ନାସିକରୁ ଆମଦାନୀ ଅଧିକ ଦରରେ ହେଉଥିବା କାରଣରୁ ପିଆଜ ଦର ଏକପ୍ରକାର ବଢୁଥିବା କହିଛନ୍ତି ବ୍ୟବସାୟୀ ସଂଘ | ଫସଲ ଉତ୍ପାଦନର ପରିମାଣ ହ୍ରାସ ଓ କର୍ପୋରେଟ ସଂସ୍ଥାଙ୍କ ମନମୁଖୀ ଦର ନିୟନ୍ତ୍ରଣ, ଦର ଅସ୍ଥିର ରହିବାର ମୁଖ୍ୟ କାରଣ | ତେବେ ଆଗକୁ ଦର ଆହୁରି ବଢିପାରେ ବୋଲି ଆଶଙ୍କା କରିଛନ୍ତି ବ୍ୟବସାୟୀ ସଂଘ | ମାସେ ପରେ ପରିବା ଦରରେ ଟିକେ ଆଶ୍ବସ୍ତି ମିଳିପାରେ ବୋଲି ମତ ରଖିଛନ୍ତି ସଂଘ |
Comments are closed.