President Himachal Pradesh Visit : ଦିଲ୍ଲୀରୁ ଶିମଲା ଯିବ କାର୍ଯ୍ୟାଳୟ, ମାଟି ଘରେ ରହିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ

ଶିମଲା: ଶିମଲା ସ୍ଥାନାନ୍ତରିତ ହେବ ରାଷ୍ଟ୍ରପତି କାର୍ଯ୍ୟାଳୟ

୧୭୫ ବର୍ଷ ପୁରୁଣା ମାଟି କୋଠାରେ ରହିବେ ମହାମହିମ

୬ ଦିନ ପାଇଁ ଶିମଲାରୁ କାମ କରିବେ ଦ୍ରୌପଦୀ ମୁର୍ମୁ

ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏପ୍ରିଲ ୨୭ ରୁ ମେ ୨ ପର୍ଯ୍ୟନ୍ତ ଶିମଲା ଗସ୍ତ କରୁଛନ୍ତି। ଏହି ଛଅ ଦିନ ପାଇଁ ରାଷ୍ଟ୍ରପତିଙ୍କ କାର୍ଯ୍ୟାଳୟ ଦିଲ୍ଲୀରୁ ଶିମଲାକୁ ସ୍ଥାନାନ୍ତରିତ କରାଯିବ। ହିମାଚଳ ସରକାର ରାଷ୍ଟ୍ରପତିଙ୍କ ଗସ୍ତ ପାଇଁ ପ୍ରାୟ ସମସ୍ତ ପ୍ରସ୍ତୁତି ସମାପ୍ତ କରିସାରିଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଛଅ ଦିନିଆ ରହଣି ସମୟରେ, ରାଷ୍ଟ୍ରପତି ଭବନରୁ ସମସ୍ତ ଗୁରୁତ୍ୱପୂର୍ଣ୍ଣ ଫାଇଲ୍ ଏଠାକୁ ଅଣାଯିବ, ଏବଂ ରାଷ୍ଟ୍ରପତିଙ୍କ ସଚିବାଳୟ ଛଅ ଦିନ ପାଇଁ ଶିମଲାରୁ କାର୍ଯ୍ୟ କରିବ।

ଏହାର କାରଣ ହେଉଛି ଦିଲ୍ଲୀ ବ୍ୟତୀତ ରାଷ୍ଟ୍ରପତିଙ୍କ ସରକାରୀ ବାସଭବନ କେବଳ ସିମଲା ଏବଂ ହାଇଦ୍ରାବାଦରେ ଅଛି। ଦେଶରେ କେବଳ ତିନୋଟି ସ୍ଥାନରେ ରାଷ୍ଟ୍ରପତିଙ୍କ ବାସଭବନ ରହିଛି। ଏଥିମଧ୍ୟରୁ ସବୁଠାରୁ ପୁରୁଣା ସିମଲାର ମଶୋବରାରେ ଅବସ୍ଥିତ। ଏହା ପୂର୍ବରୁ ଦି ରିଟ୍ରିଟ୍ ନାମରେ ଜଣାଶୁଣା ଥିଲା। ଏହା ସିମଲାରୁ ୧୨ କିଲୋମିଟର ଦୂରରେ ମଶୋବରାର ଶାନ୍ତ ଏବଂ ମନୋରମ ପାହାଡ଼ରେ ଅବସ୍ଥିତ। ରାଷ୍ଟ୍ରପତିଙ୍କ ବାସଭବନ ମଶୋବ୍ରା ୧୭୫ ବର୍ଷରୁ ଅଧିକ ପୁରୁଣା। ଏହାର ନିର୍ମାଣ ଶୈଳୀ ଧଜ୍ଜୀ ନିର୍ମାଣ ପରି। ଏଥିରେ କାଠ ଏବଂ ମାଟିରେ ତିଆରି କାନ୍ଥ ରହିଛି। ଏହି କୋଠାର ଅନନ୍ୟ ବୈଶିଷ୍ଟ୍ୟ ହେଉଛି ଏହା ଭୂମିକମ୍ପ ପ୍ରତିରୋଧୀ। ଏହି ଧଜ୍ଜୀ ନିର୍ମାଣ ଶୈଳୀରେ ପ୍ରସ୍ତୁତ, ଯାହା ଗ୍ରୀଷ୍ମ ଋତୁରେ ଥଣ୍ଡା ଏବଂ ଶୀତ ଋତୁରେ ଘର ଭିତର ଉଷ୍ମ ରଖିଥାଏ।

ମଶୋବରାରେ ଭାରତର ରାଷ୍ଟ୍ରପତିଙ୍କ ସରକାରୀ ବାସଭବନ ଅନେକ ଆକର୍ଷଣ ବହନ କରେ। ଏଥିରେ ଏକ ସୁନ୍ଦର ସେଓ ବଗିଚା ରହିଛି, ଯେଉଁଥିରେ ବିଦେଶୀ ପ୍ରକାରର ତିନି ଶହରୁ ଅଧିକ ସେଓ ଗଛ ରହିଛି। ସବୁଠୁ ବେଶୀ ଚମତ୍କାର ଏବଂ ଆଖି ଝଲସିବା ଭଳି ମନୋରମ ଦୃଶ୍ୟ ହେଉଛି, ଏଠିକାର ଟୁଲିପ୍ ଉଦ୍ୟାନ। ଯାହା ରଙ୍ଗବେରଙ୍ଗ ଫୁଲରେ ଭର୍ତ୍ତି ହୋଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ତିନି ବର୍ଷ ପୂର୍ବେ ଏପ୍ରିଲରେ ଏହି ଟୁଲିପ୍ ବଗିଚାର ଉଦଘାଟନ କରିଥିଲେ। ଏଠାରେ ଡେନିସ୍, ୱାଲମାର୍କ ଏବଂ ଜାମ୍ବୋରୀ ପ୍ରକାରର ସୁନ୍ଦର ଟୁଲିପ୍ ଫୁଟିଛି। ଭିତର କୋଠରୀଗୁଡ଼ିକୁ ସୁନ୍ଦର ଭାବରେ ସଜାଯାଇଛି। ରାଷ୍ଟ୍ରପତିଙ୍କ ପାଇଁ ଏକ ପୃଥକ କୋଠରୀ ଅଛି। ସମଗ୍ର କୋଠା ସବୁଜିମାର ଏକ ସୁନ୍ଦର ବିସ୍ତାର ଦ୍ୱାରା ଘେରି ରହିଛି, ଯାହା ଆଖପାଖ ଅଞ୍ଚଳର ୩୬୦-ଡିଗ୍ରୀ ଦୃଶ୍ୟ ପ୍ରଦାନ କରେ।

ଏହି ମଶୋବରା ସ୍ଥିତ ରାଷ୍ଟ୍ରପତିଙ୍କ ବାସଭବନ, ତିନି ବର୍ଷ ପୂର୍ବେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିର୍ଦ୍ଦେଶରେ ସାଧାରଣ ଏବଂ ପର୍ଯ୍ୟଟକଙ୍କ ପାଇଁ ଖୋଲାଯାଇଥିଲା। ପର୍ଯ୍ୟଟକମାନେ ଟିକେଟ୍ କିଣି ଏହି ସ୍ଥାନ ପରିଦର୍ଶନ କରିପାରିବେ। କିନ୍ତୁ ବର୍ତ୍ତମାନରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି, ଏହାକୁ ପର୍ଯ୍ୟଟକଙ୍କ ପାଇଁ ବନ୍ଦ କରିଦିଆଯାଇଛି। ରାଷ୍ଟ୍ରପତିଙ୍କ ଗସ୍ତ ପରେ, ଏହା ମେ ୩ ତାରିଖରେ ପୁଣି ଖୋଲିବ।