Biological Father: ସ୍ୱାମୀ ଯଦି ପିଲାର ବାୟୋଲୋଜିକାଲ ପିତା ନୁହଁନ୍ତି, ତେବେ ଖର୍ଚ୍ଚ ଦେବାକୁ ବାଧ୍ୟ ନୁହଁନ୍ତି: ସୁପ୍ରିମକୋର୍ଟଙ୍କ ଐତିହାସିକ ରାୟ
ନୂଆଦିଲ୍ଲୀ: ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବିବାଦ ଏବଂ ଛାଡ଼ପତ୍ର ପରେ ପିଲାଙ୍କ ଭରଣପୋଷଣ ଦାବି ମାମଲାରେ ସୁପ୍ରିମକୋର୍ଟ ଏକ ବଡ଼ ନିଷ୍ପତ୍ତି ଶୁଣାଇଛନ୍ତି । ସର୍ବୋଚ୍ଚ ନ୍ୟାୟାଳୟ ସ୍ପଷ୍ଟ କରିଛନ୍ତି ଯେ, ଯଦି ଡିଏନ୍ଏ (DNA) ଟେଷ୍ଟ ରିପୋର୍ଟରୁ ଏହା ପ୍ରମାଣିତ ହୁଏ ଯେ ଜଣେ ବ୍ୟକ୍ତି ସମ୍ପୃକ୍ତ ପିଲାର ଜୈବିକ ପିତା (Biological Father) ନୁହଁନ୍ତି, ତେବେ ତାଙ୍କୁ ସେହି ପିଲା ପାଇଁ କୌଣସି ଭରଣପୋଷଣ ଦେବାକୁ ପଡ଼ିବ ନାହିଁ । ଏହି ନିୟମ ସେତେବେଳେ ମଧ୍ୟ ଲାଗୁ ହେବ, ଯେତେବେଳେ ପିଲାଟି ବୈବାହିକ ସମ୍ପର୍କ ଭିତରେ ଜନ୍ମ ଗ୍ରହଣ କରିଥିବ ।
ଜଷ୍ଟିସ ସଞ୍ଜୟ କରୋଲ ଏବଂ ଜଷ୍ଟିସ ଏନ. କୋଟିଶ୍ୱର ସିଂହଙ୍କୁ ନେଇ ଗଠିତ ଖଣ୍ଡପୀଠ ଏହି ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି । ସାଧାରଣତଃ ଆଇନଗତ ଧାରଣା ଅନୁଯାୟୀ, ବୈବାହିକ ସମ୍ପର୍କ ଥିବା ସମୟରେ ଜନ୍ମିତ ପିଲାକୁ ବୈଧ ସନ୍ତାନ ବୋଲି ଗ୍ରହଣ କରାଯାଇଥାଏ । ତେବେ କୋର୍ଟ ନିଜ ରାୟରେ ସ୍ପଷ୍ଟ କରିଛନ୍ତି ଯେ, ଯେତେବେଳେ ପାରମ୍ପରିକ ଆଇନଗତ ଧାରଣା ଏବଂ ବୈଜ୍ଞାନିକ ପ୍ରମାଣ ମଧ୍ୟରେ ତୁଳନା କରାଯିବ ବା ଦ୍ୱନ୍ଦ୍ୱ ଉପୁଜିବ, ସେତେବେଳେ ବୈଜ୍ଞାନିକ ପ୍ରମାଣକୁ ହିଁ ପ୍ରାଥମିକତା ଦିଆଯିବ ।
ଖଣ୍ଡପୀଠ ନିଜ ରାୟରେ କହିଛନ୍ତି ଯେ, “ବୈଜ୍ଞାନିକ ପ୍ରମାଣ ଆଇନଗତ ଧାରଣା ଠାରୁ ଉର୍ଦ୍ଧ୍ୱରେ । ଯଦି DNA ରିପୋର୍ଟରୁ ସ୍ପଷ୍ଟ ଭାବେ ପ୍ରମାଣିତ ହେଉଛି ଯେ ସ୍ୱାମୀ ଜଣକ ପିଲାର ଜୈବିକ ପିତା ନୁହଁନ୍ତି, ତେବେ ନ୍ୟାୟାଳୟ ଏହି ବୈଜ୍ଞାନିକ ସତ୍ୟକୁ କଦାପି ଅଣଦେଖା କରିପାରିବେ ନାହିଁ ।”
ସୁପ୍ରିମକୋର୍ଟଙ୍କ ଏହି ରାୟ ପାରିବାରିକ ଆଇନ କ୍ଷେତ୍ରରେ ଏକ ନୂଆ ଦିଗଦର୍ଶନ ସୃଷ୍ଟି କରିବ ବୋଲି ଆଶା କରାଯାଉଛି । ବିଶେଷ କରି ମିଥ୍ୟା ଭରଣପୋଷଣ ଦାବି ମାମଲାଗୁଡ଼ିକରେ ଏହା ଏକ ବଡ଼ ସ୍ପଷ୍ଟୀକରଣ ଆଣିଛି ।