Latest Odisha News

BREAKING NEWS

ରାଜା ରଘୁବଂଶୀ ହତ୍ୟା ମାମଲାରେ ରାଗିଗଲେ କଙ୍ଗନା, କହିଲେ ‘ମୂର୍ଖତା ପ୍ରତି ସାବଧାନ ରୁହନ୍ତୁ’

ନୂଆଦିଲ୍ଲୀ: ବହୁ ଚର୍ଚ୍ଚିତ ମଧ୍ୟପ୍ରଦେଶ ଇନ୍ଦୋରର ରାଜା ରଘୁବଂଶୀ ହତ୍ୟା ମାମଲା ଉପରେ ବଲିଉଡ୍ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରାଣାୱତ ତାଙ୍କର ତୀବ୍ର ପ୍ରତିକ୍ରିୟା ଦେଇଛନ୍ତି । ସେ ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ ଏହି ଘଟଣାକୁ “କ୍ରୁର, ଭୟଙ୍କର ଏବଂ ସବୁଠୁ ଘୃଣ୍ୟ” ବୋଲି ବର୍ଣ୍ଣନା କରିଛନ୍ତି । ରାଜା ରଘୁବଂଶୀ ହତ୍ୟା ମାମଲା ସମ୍ପର୍କରେ କଙ୍ଗନା ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ଏକ ଲମ୍ବା ପୋଷ୍ଟ ଲେଖିଛନ୍ତି । ଯେଉଁଥିରେ ସେ ଏକ ବଡ଼ କଥା କହିଛନ୍ତି ।

କଙ୍ଗନା ଲେଖିଛନ୍ତି, “ଏହା କେତେ ଅଦ୍ଭୁତ! ଜଣେ ମହିଳା ତାଙ୍କ ପିତାମାତାଙ୍କ ଭୟରେ ବିବାହ ପାଇଁ ହଁ କହିପାରିବେ ନାହିଁ, କିନ୍ତୁ ସେ ଜଣେ କଣ୍ଟ୍ରାକ୍ଟ କିଲରଙ୍କୁ ନିଯୁକ୍ତି ଦେଇ ତାଙ୍କ ସ୍ୱାମୀଙ୍କୁ ହତ୍ୟା କରିବାକୁ ଷଡଯନ୍ତ୍ର କରିପାରିବେ । ମୁଁ ସକାଳ ଠାରୁ ଏହା ବିଷୟରେ ଭାବୁଥିଲି କିନ୍ତୁ ମୁଁ ଏହାକୁ ବୁଝିପାରୁନାହିଁ । ମୋର ମୁଣ୍ଡ ବିନ୍ଧୁଛି! ସେ ନା ଛାଡପତ୍ର ନେଇପାରିଥାନ୍ତେ ନା ତାଙ୍କ ପ୍ରେମିକଙ୍କ ସହ ପଳାଇଯାଇଥାନ୍ତେ।”

ସେ ଆହୁରି ମଧ୍ୟ କହିଛନ୍ତି, “ଏହା ଏତେ ନିଷ୍ଠୁର, ଘୃଣ୍ୟ ଏବଂ ସର୍ବୋପରି ଅଯୌକ୍ତିକ ଏବଂ ମୂର୍ଖତାପୂର୍ଣ୍ଣ । ମୂର୍ଖ ଲୋକଙ୍କୁ କେବେବି ହାଲୁକା ଭାବରେ ନେବା ଉଚିତ୍ ନୁହେଁ । ସେମାନେ ସମାଜ ପାଇଁ ସବୁଠାରୁ ବଡ଼ ବିପଦ । ଆମେ ପ୍ରାୟତଃ ସେମାନଙ୍କର ମୂର୍ଖତା ଉପରେ ହସୁ ଏବଂ ଭାବୁ ଯେ ସେମାନେ ନିର୍ଦ୍ଦୋଷ, କିନ୍ତୁ ଏହା ସତ୍ୟ ନୁହେଁ । ବୁଦ୍ଧିମାନ ଲୋକମାନେ ନିଜ ଲାଭ ପାଇଁ ଅନ୍ୟମାନଙ୍କୁ କ୍ଷତି ପହଞ୍ଚାଇ ପାରନ୍ତି, କିନ୍ତୁ ମୂର୍ଖ ଲୋକମାନେ ଜାଣିପାରନ୍ତି ନାହିଁ ଯେ ସେମାନେ କ’ଣ କରୁଛନ୍ତି । ଆପଣଙ୍କ ଚାରିପାଖର ମୂର୍ଖତା ପ୍ରତି ବହୁତ ସତର୍କ ରୁହନ୍ତୁ।”

ଏହି ମାମଲା ରାଜା ରଘୁବଂଶୀ ଏବଂ ତାଙ୍କ ପତ୍ନୀ ସୋନମଙ୍କ ସହ ଜଡିତ, ଯେଉଁମାନେ ମେଘାଳୟର ସୋହରାରେ ସେମାନଙ୍କ ହନିମୁନ ସମୟରେ ନିଖୋଜ ହୋଇଯାଇଥିଲେ । ମେ ୨୩ ତାରିଖରେ ଦୁହେଁ ନିଖୋଜ ହୋଇଯାଇଥିଲେ । ଜୁନ୍ ୨ ତାରିଖରେ ରାଜାଙ୍କ ମୃତଦେହ ୱେଇସାୱାଡୋଙ୍ଗ ଜଳପ୍ରପାତ ନିକଟରେ ଏକ ଗଭୀର ଖାଇରୁ ମିଳିଥିଲା, ଯେତେବେଳେ କି ସୋନମ ନିଖୋଜ ଥିଲେ । ଏବେ ଏହି ମାମଲାରେ ଏକ ବଡ଼ ଖୁଲାସା ହୋଇଛି । ପୋଲିସ ରାଜାଙ୍କ ପତ୍ନୀ ସୋନମ ରଘୁବଂଶୀଙ୍କ ସମେତ ଚାରି ଜଣଙ୍କୁ ଗିରଫ କରିଛି । ସୋନମଙ୍କୁ ବାରାଣସୀ-ଗାଜିପୁର ମୁଖ୍ୟ ରାସ୍ତାରେ ଏକ ଢାବା ନିକଟରେ ଧରିଛି ପୋଲିସ । ଏହା ବ୍ୟତୀତ ବିଶାଲ ଚୌହାନ, ରାଜ କୁଶୱାହା ଏବଂ ଆକାଶ ରାଜପୁତଙ୍କୁ ମଧ୍ୟ ଗିରଫ କରାଯାଇଛି । ସୋନମଙ୍କୁ ଗିରଫ କରିବା ପାଇଁ ମେଘାଳୟ ପୋଲିସ ଉତ୍ତର ପ୍ରଦେଶର ଗାଜିପୁରରେ ପହଞ୍ଚିଛି ।

 

Comments are closed.