ନୂଆଦିଲ୍ଲୀ: ଟେଷ୍ଟ କ୍ରିକେଟରେ ନୋ ବଲ ସଂଖ୍ୟା ବୃଦ୍ଧି ପାଇବା ପୂର୍ବତନ କ୍ରିକେଟରଙ୍କୁ ଚିନ୍ତାରେ ପକାଇଛି । ଏଥିନେଇ ବିଭିନ୍ନ ପ୍ରସ୍ତାବ ମଧ୍ୟ ଦିଆଯାଉଛି । ମହାନ ଖେଳାଳି ସୁନୀଲ ଗାଭାସ୍କର ନୋ ବଲ ଉପରେ ଜରିମାନା ଲଗାଇବାକୁ କହିଛନ୍ତି । ପରେ ଏହି ଅର୍ଥରେ ଉଭୟ ଦଳର ଖେଳାଳିମାନେ ନୈଶ୍ୟଭୋଜି କରିପାରିବେ ବୋଲି ସେ କହିଛନ୍ତି । ନୋ-ବଲ୍ ପକାଉଥିବା ବୋଲରଙ୍କ ଉପରେ ତୁରନ୍ତ ଆର୍ଥିକ ଜରିମାନା ଲଗାଯାଉ । ଯଦି ସେହି ବୋଲର ପୁଣି ଭୁଲ୍ ଦୋହରାନ୍ତି, ତେବେ ଜରିମାନା ରାଶିକୁ ପ୍ରତ୍ୟେକ ଥର ଦ୍ୱିଗୁଣିତ କରାଯାଉ । ବୋଲରଙ୍କ ପ୍ରତ୍ୟେକ ଭୁଲ୍ ପାଇଁ ବୋଲିଂ କୋଚ୍ଙ୍କ ଉପରେ ମଧ୍ୟ ବୋଲରଙ୍କ ଜରିମାନାର ଅଧା ଅଂଶ ଦଣ୍ଡ ଆକାରରେ ଲାଗୁ କରାଯାଉ । ଜରିମାନାରୁ ମିଳୁଥିବା ଟଙ୍କାକୁ ସିରିଜ୍ ଶେଷରେ ଦଳର ସମସ୍ତ ଖେଳାଳି ଏକାଠି ହୋଇ କରୁଥିବା ଅନ୍ତିମ ଡିନର୍ ପାଇଁ ବ୍ୟବହାର କରାଯାଉ ।
ଗାଭାସ୍କରଙ୍କ ଅନୁଯାୟୀ, ଏହା ଦ୍ୱାରା ଟିମ୍ରେ ଏକ ମଜାଦାର ପରିବେଶ ସୃଷ୍ଟି ହେବ ଏବଂ ଖେଳାଳିଙ୍କ ମଧ୍ୟରେ ସମ୍ପର୍କ ଆହୁରି ନିବିଡ଼ ହେବ । ଗାଭାସ୍କର ଲେଖିଛନ୍ତି ଯେ କ୍ରିକେଟରେ ବ୍ୟାଟର ଗାର୍ଡ ନେବା ଏବଂ ବୋଲର ନୋ-ବଲ୍ ନପକାଇବା ଏହି ଦୁଇଟି ଜିନିଷ ସମ୍ପୂର୍ଣ୍ଣ ଭାବେ ଖେଳାଳିଙ୍କ ନିଜ ନିୟନ୍ତ୍ରଣରେ ଥାଏ । ଆଜିକାଲି ରନ୍-ଅପ୍ ମାପିବା ପାଇଁ ଟେପ୍ ମିଳୁଥିବାରୁ କ୍ରିଜ୍ ଡେଇଁ ଗୋଡ଼ ଆଗକୁ ଯିବା ପାଇଁ କୌଣସି ବାହାନା ଚଳିବ ନାହିଁ । ଓଭରଥ୍ରୋ ସମୟରେ ବ୍ୟାକ୍-ଅପ୍ ନଦେବା ଭଳି କ୍ଷେତ୍ରରକ୍ଷଣ ଭୁଲ୍ ପାଇଁ ସମଗ୍ର ଟିମ୍ ଭୋଟିଂ ଜରିଆରେ ଜରିମାନା ସ୍ଥିର କରନ୍ତୁ । ସ୍ପିନ୍ ବୋଲିଂ କୋଚ୍ ସାଇରାଜ ବହୁତୁଲେ ମଜାକରେ ପ୍ରସ୍ତାବ ଦେଇଥିଲେ ଯେ ଟେଷ୍ଟ କ୍ରିକେଟରେ ମଧ୍ୟ ନୋ-ବଲ୍ ପାଇଁ ଫ୍ରି-ହିଟ୍ ଦିଆଯାଉ । ଏହାକୁ ପ୍ରତ୍ୟାଖ୍ୟାନ କରି ଗାଭାସ୍କର କହିଛନ୍ତି ଯେ ଟେଷ୍ଟରେ ଗୋଟିଏ ଓଭରରେ ବାଉନ୍ସର ସୀମା (ସର୍ବାଧିକ ୨ଟି) ଏବଂ ଛୋଟ ବାଉଣ୍ଡ୍ରି ଯୋଗୁଁ ବ୍ୟାଟରଙ୍କ ପାଇଁ ରନ୍ କରିବା ଆଗରୁ ସହଜ ହୋଇସାରିଛି । ତେଣୁ ଫ୍ରି-ହିଟ୍ ଦେଇ ବ୍ୟାଟରଙ୍କ ପାଇଁ ଖେଳକୁ ଆହୁରି ସହଜ କରିବାର କୌଣସି ପ୍ରଶ୍ନ ଉଠୁନାହିଁ ।
