ଭୁୂବନେଶ୍ୱର: ବ୍ୟସ୍ତ ବହୁଳ ଜୀବନରେ ଶାରୀରିକ ସୁସ୍ଥତାକୁ ଆମେ ଅନେକ ସମୟରେ ନଜରଅନ୍ଦାଜ କରିଦେଇ ଥାଉ । ପରେ ଏଇ ସାମାନ୍ୟ ତ୍ରୁଟି ପାଇଁ ବଡ ଧରଣର ଅସୁବିଧାକୁ ସାମ୍ନା କରିଥାଉ । ଅନେକ ଶାରୀରିକ ସମସ୍ୟାକୁ ଆମେ ଘରୋଇ ଉପାୟରେ ସମାଧାନ କରିପାରିବା । ହେଲେ ଆମେ ଏହାକୁ ଗୁରୁତ୍ୱ ଦେଇ ନ ଥାଉ । ଯେମିତି ଶରୀରରେ ୟୁରିକ ଏସିଡ ସମସ୍ୟା ।
ଶରୀରରେ ୟୁରିକ ଏସିଡ୍ର ମାତ୍ରା ବଢିବା ଶରୀର ପକ୍ଷେ ଭଲ ନୁହେଁ । ଶରୀରରେ ପ୍ୟୁରିନର ମାତ୍ରା ବଢିଲେ ମଧ୍ୟ ୟୁରିକ ଏସିଡ୍ର ମାତ୍ରା ବଢିଥାଏ । ୟୁରିକ ଏସିଡର ସ୍ପଟିକ ଗୁଡିକ ଗଣ୍ଠିରେ ଜମା ରହିଥାଏ । ଯାହାଫଳରେ ହାତ ଗୋଡ ଓ ଆଙ୍ଗୁଠିର ଗଣ୍ଠିରେ ଯନ୍ତ୍ରଣା ହୋଇଥାଏ । ହେଲେ ଏମିତି କିଛି ଫଳ ରହିଛି ଯାହାକୁ ନିୟମିତ ଖାଇଲେ, ୟୁରିକ ଏସିଡର ସ୍ତରକୁ କମ କରିବା ସହ ଅତିରିକ୍ତ ୟୁରିକ ଏସିଡ୍କୁ ଶରୀରରୁ ବାହାର କରିବାରେ ସାହାଯ୍ୟ କରିବ । ତେବେ କେଉଁ ଫଳ ସେବନ ଦ୍ୱାରା ୟୁରିକ ଏସିଡ ମାତ୍ରା କମିବ ଆସନ୍ତୁ ଜାଣିବା ।
ଚେରି – ଲାଲ ରଙ୍ଗର ଚେରିରେ ଆଣ୍ଟିଅକ୍ସିଡେଣ୍ଟ ରହିଛି । ଯାହା ଶରୀରର ଗଣ୍ଠି ବିନ୍ଧା କମ କରିବାରେ ସାହାଯ୍ୟ କରିଥାଏ । ଚେରିକୁ ଆପଣ ଜୁସ୍ କରିକି ମଧ୍ୟ ପିଇପାରିବେ ।
କିଓ୍ୱି – ଶରୀର ପ୍ରତି ଭାରି ଲାଭଦାୟକ କିଓ୍ୱି । ଶରୀରର ବିଭିନ୍ନ ସମସ୍ୟା ଦୂର କରିବା ସହ ୟୁରିକ ଏସିଡ୍ ନିୟନ୍ତ୍ରଣ କରିଥାଏ । କିଓ୍ୱିରେ ଭିଟାମିନ ସି, ଭିଟାମିନ ଇ, ଫୋଲେଡ ଏବଂ ପୋଟାସିୟମ ରହିଥାଏ । ଏହି ଫଳର ଦାମ ଟିକିଏ ଅଧିକ ରହିଥିଲେ ବି ଏହା ଶରୀର ପାଇଁ ଉପକାରୀ ।
କଦଳୀ – ଶରୀରରେ ପ୍ୟୁରିନ ବଢିଲେ ୟୁରିକ ଏସିଡ୍ ବଢିଥାଏ । କିନ୍ତୁ କଦଳୀ ଶରୀରରେ ପ୍ୟୁରିନର ମାତ୍ରା କମ କରିବାରେ ସାହାଯ୍ୟ କରିଥାଏ । ବିଶେଷ କରି ଯଦି ଶରୀରର ଗଣ୍ଠିରେ ଭୀଷଣ ଦରଜ ହେଉଥାଏ ତେବେ କଦଳୀର ସେବନ ଲାଭଦାୟକ ହୋଇଥାଏ ।
ସେଓ – ସେଓରେ ପ୍ରଚୁର ପରିମାଣରେ ଫାଇବର ରହିଥାଏ, ଯାହାକି ୟୁରିକ ଏସିଡ୍କୁ କମ କରିବାରେ ସାହାଯ୍ୟ କରିଥାଏ । ଏହା ସହ ସେଓ ଭିନେଗାର ମଧ୍ୟ ବ୍ୟବହାର କରିପାରିବେ । ଗୋଟିଏ ଗ୍ଲାସ ପାଣିରେ ଏକ ଚାମଚ ସେଓ ଭିନେଗାର ପକାଇ ପିଇ ପାରିବେ ।
କମଳା- ପ୍ରାୟତଃ ସବୁ ସାଇଟ୍ରିକ ଫଳ ୟୁରିକ ଏସିଡ କମ କରିବାରେ ସାହାଯ୍ୟ କରିଥାଏ । କମଳା ଭିଟାମିନ ସି ଯୁକ୍ତ ହୋଇଥିବାରୁ ଶରୀରରୁ ୟୁରିକ ଏସିଡ୍ ବାହାର କରିବାରେ ସାହାଯ୍ୟ କରିଥାଏ । ଏହାକୁ ଜୁସ କରି ମଧ୍ୟ ପିଇ ପାରିବେ ।
ୟୁରିକ ଏସିଡ୍କୁ କମ କରିବାକୁ ହେଲେ କେତେକ ପରିବା ଯେମିତି ବ୍ରୋକଲି, ଗାଜର ଏବଂ କାକୁଡି ସେବନ କରିବା ଉଚିତ ।