ନୂଆଦିଲ୍ଲୀ : ନୂଆଦିଲ୍ଲୀ ସ୍ଥିତ ଏମ୍ସରେ ଚିକିତ୍ସିତ ହେଉଥିବା ଯୋଡାମୁଣ୍ଡ ଶିଶୁ ଜଗା-କାଳିଆ ଖୁବଶୀଘ୍ର ଓଡିଶା ଫେରିବେ ।
ଗଣମାଧ୍ୟମକୁ ସୂଚନା ଦେଇ ଏମ୍ସର ଜଣେ ଡାକ୍ତର କହିଛନ୍ତି, ଉଭୟ ଜଗା ଓ କାଳିଆଙ୍କ ସ୍ୱାସ୍ଥ୍ୟବସ୍ଥାରେ ସୁଧାର ଆସିଛି । ବର୍ତ୍ତମାନ ସମୟରେ ସେମାନଙ୍କୁ ଆଇସିୟୁ କିମ୍ବା ସ୍ୱତନ୍ତ୍ର ୱାର୍ଡରେ ରଖିବାର କୌଣସି ଆବଶ୍ୟକତା ନାହିଁ । ଜଗା ସମ୍ପୂର୍ଣ୍ଣ ରୂପେ ସୁସ୍ଥ ଥିବାବେଳେ କାଳିଆ ଟ୍ୟୁବ୍ ପରିବର୍ତ୍ତେ ପାଟିବାଟେ ଖାଦ୍ୟ ଗ୍ରହଣ କରୁଛି ।
ଆସନ୍ତା ଜୁନମାସ ଶେଷ ସୁଦ୍ଧା ଏହି ଦୁଇ ଶିଶୁଙ୍କୁ ଓଡିଶା ସ୍ଥାନାନ୍ତର କରାଯିବ । ଜଣେ ଡାକ୍ତର ଓ ନର୍ସଙ୍କ ତତ୍ତ୍ୱାବଧାନରେ ସେମାନଙ୍କୁ ଓଡିଶା ଆଣିବାକୁ ଓଡିଶା ସରକାର ପ୍ରସ୍ତାବ ଦେଇଥିଲେ ବୋଲି ଏମ୍ସ କର୍ତ୍ତୃପକ୍ଷ ସୂଚନା ପ୍ରଦାନ କରିଛନ୍ତି । ଏଥିସହିତ ଓଡିଶାରେ ଜାରି ରହିଥିବା ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ୨ ଶିଶୁଙ୍କୁ ଓଡିଶା ପଠାଯିବ । ଆହୁରି ମଧ୍ୟ ରାଜ୍ୟ ସରକାର ଉଭୟଙ୍କ ଚିକିତ୍ସା ଓ ବର୍ତ୍ତମାନର ସ୍ଥିତି ନେଇ ଏମ୍ସ କର୍ତ୍ତୃପକ୍ଷଙ୍କୁ ବିସ୍ତୃତ ରିପୋର୍ଟ ମାଗିଥିବା ଜଣାପଡିଛି ।